
काठमाडौं । नेपालमा हाल पश्चिमी न्यूनचापीय प्रणाली सक्रिय रहेकाले मौसममा बदली देखिएको छ । मौसम पूर्वानुमान महाशाखाका अनुसार कोशी, बागमती र गण्डकी प्रदेशका पहाडी तथा हिमाली क्षेत्रमा आज (बुधबार) हल्का वर्षासँगै हिमपातको सम्भावना रहेको छ ।
३ प्रदेशको उच्च पहाडी तथा हिमाली भू–भागमा सामान्यदेखि पूर्ण बदली रहनेछ भने बाँकी पहाडी क्षेत्रमा आंशिक बदली रहने अनुमान गरिएको छ । तराईका केही स्थानमा दिउँसो र राति हुस्सु तथा कुहिरो लाग्ने सम्भावना छ ।
महाशाखाका अनुसार कोशी, बागमती र गण्डकी प्रदेशका उच्च भू–भागका १–२ स्थानमा हल्का हिमपातसहित वर्षा हुन सक्नेछ । रातिको समयमा कोशी र गण्डकी प्रदेशका हिमाली क्षेत्रमा पनि यस्तै अवस्था दोहोरिन सक्ने पूर्वानुमान छ ।
हिमपात र वर्षाका कारण ती क्षेत्रहरूमा चिसो बढ्ने, दैनिक जनजीवन प्रभावित हुने, पर्यटन तथा पदयात्रामा असर पर्न सक्ने र हवाई तथा सडक यातायातमा समेत अवरोध आउन सक्ने देखिएको छ । यसलाई मध्यनजर गर्दै महाशाखाले सम्बन्धित सबै पक्षलाई आवश्यक सतर्कता अपनाउन आग्रह गरेको छ ।

























