
विराटनगर। नेपाली मूलका अमेरिकी धावक बाल जोशीले राष्ट्रिय पोसाक दौरा सुरुवाल लगाएर ‘विश्व म्याराथन च्यालेञ्ज’ पूरा गर्दै गिनिज बुक अफ वर्ल्ड रेकर्ड्समा आफ्नो नाम लेखाउन सफल भएका छन् । सात महादेशमा सात दिन लगातार सञ्चालन भएको सात वटा म्याराथनमा दौरा सुरुवालमै दगुरेर उनले यो दुर्लभ कीर्तिमान कायम गरेका हुन् ।
शुक्रबार अमेरिकाको मायामीमा आयोजित समापन समारोहका बीच गिनिज बुकका प्रतिनिधि माइकल इम्प्रिकले जोशीलाई विश्व कीर्तिमानको प्रमाणपत्र प्रदान गरे । अत्यन्तै चुनौतीपूर्ण मानिने यो म्याराथन यात्रा अन्टार्कटिकाबाट सुरु भएको थियो । त्यसपछि अफ्रिकाको केप टाउन, अस्ट्रेलियाको पर्थ, एसियाको दुबई, युरोपको म्याड्रिड र दक्षिण अमेरिकाको ब्राजिल हुँदै सातौँ दिनमा उत्तर अमेरिकाको मायामीमा पुगेर यो साहसिक दौड सम्पन्न भएको हो ।
सन् २०१५ देखि सञ्चालन हुँदै आएको यस प्रतियोगितालाई ‘७७७ म्याराथन’ समेत भनिन्छ । यस वर्षको म्याराथनमा जोशीसहित ३२ देशका ५६ धावकहरू सहभागी थिए । लगातार सात दिनसम्म सातै महादेशमा पुगेर दौडनु पर्ने भएकाले यसलाई शारीरिक र मानसिक रूपमा निकै कठिन प्रतिस्पर्धा मानिन्छ ।
आफू जन्मेको माटो र नेपाली मौलिक सम्पदाप्रतिको उच्च सम्मान दर्शाउनका लागि दौरा सुरुवालमै म्याराथनमा सहभागी भएको जोशीले बताए । उनले लगाएको सो विशेष दौरा सुरुवाल काठमाडौँका फेसन डिजाइनर विश्व गौतमले तयार पारेका थिए । नेपाली पहिचानलाई विश्वस्तरमा चिनाउन जोशीले गरेको यो प्रयासको यतिबेला जताततै प्रशंसा भइरहेको छ ।

























