
वीरगन्ज । पर्सामा अवैध गोदाममा छापा मार्न पुगेको सशस्त्र प्रहरीको टोलीमाथि तस्कर समूहले आक्रमण गरेको छ। वीरगन्ज महानगरपालिका–१० स्थित एक गोदाममा सोमबार बिहान छापा मार्ने क्रममा भएको सो झडपमा परी ३ जना सशस्त्र प्रहरी घाइते भएका छन्।
सशस्त्र प्रहरी बल १३ नम्बर गण पर्साको सीमा सुरक्षा गुल्म र वीरगन्ज भन्सार कार्यालयको संयुक्त टोलीले आदर्शनगरस्थित मदनप्रसाद गुप्ताको घरमा छापा मारेको थियो। टोलीले घरभित्र अवैध रूपमा लुकाइराखेको ७ लाख रुपैयाँ बराबरको कपडा बरामद गरेपछि स्थिति तनावपूर्ण बनेको थियो।
सशस्त्र प्रहरीका सहप्रवक्ता डीएसपी शैलेन्द्र थापाले बरामद सामान लैजाने क्रममा तस्कर समूहले ढुंगामुढा प्रहार गरेको जानकारी दिए। आक्रमणबाट सशस्त्र प्रहरीको एउटा वानटन र एउटा स्कार्पियो गाडीमा समेत क्षति पुगेको छ। घाइते सुरक्षाकर्मीहरूको उपचार भइरहेको छ भने प्रहरीले घटनामा संलग्नहरूको खोजी कार्य जारी राखेको छ।

























