
काठमाडौँ। काठमाडौँ उपत्यका विकास प्राधिकरणअन्तर्गत दिव्येश्वरी जग्गा एकीकरण आयोजना भक्तपुरमा कार्यरत सव-इन्जिनियर कुमार पौड्यालविरुद्धको भ्रष्टाचार मुद्दामा साक्षी प्रमाण बुझ्ने आदेश भएको छ। विशेष अदालतका अध्यक्ष सुदर्शनदेव भट्ट तथा न्यायाधीशहरू डिल्लीरत्न श्रेष्ठ र विदुर कोइरालाको इजलासले सोमबार यस्तो आदेश दिएको हो।
अख्तियार दुरुपयोग अनुसन्धान आयोगले पौड्यालले पदको दुरुपयोग गरी ३ करोड ६३ लाख २१ हजार रुपैयाँ गैरकानुनी सम्पत्ति आर्जन गरेको अभियोगमा आइतबार मुद्दा दायर गरेको थियो। अनुसन्धानका क्रममा उनको वैध आय २ करोड ५८ लाख ९७ हजार रुपैयाँ मात्र देखिएको छ।
पौड्यालले २०५१ सालदेखि २०८० असारसम्मको अवधिमा घर निर्माण, जग्गा खरिद, पिस ब्याङकुट एन्ड रेस्टुरेन्टमा लगानी, सवारी साधन र सेयर खरिद लगायतमा ६ करोड २२ लाख १८ हजार रुपैयाँ खर्च गरेको अख्तियारले जनाएको छ। आयको तुलनामा खर्च र लगानी ३ करोड ६३ लाख रुपैयाँले बढी देखिएकाले सो बराबरको बिगो कायम गरी सजायको मागदाबी गरिएको छ।

























