
जनकपुरधाम । धनुषाको हंसपुर नगरपालिकाका मेयर प्रदीपकुमार यादवको उपचारका क्रममा निधन भएको छ । मस्तिष्कघात भएपछि उपचाररत यादवको काठमाडौंस्थित नर्भिक इन्टरनेशनल अस्पतालमा सोमबार निधन भएको हो ।
मेयर यादवलाई गत बिहीबार राति अचानक मस्तिष्कघात भएको थियो । स्वास्थ्य अवस्था गम्भीर बनेपछि उनलाई तत्काल जनकपुरधामको न्युरो अस्पतालमा भर्ना गरिएको थियो । प्रारम्भिक उपचारपछि अवस्था सुधार नआएपछि शुक्रबार हेलिकप्टरमार्फत थप उपचारका लागि काठमाडौं लगिएको थियो ।
काठमाडौं पुर्याएपछि नर्भिक अस्पतालमा सघन उपचार भइरहेको थियो । चिकित्सकको प्रयासका बाबजुद उपचारकै क्रममा उनको निधन भएको अस्पताल स्रोतले जनाएको छ ।
स्वर्गीय यादव नेपाली कांग्रेसबाट हंसपुर नगरपालिकाको मेयर पदमा निर्वाचित भएका थिए । स्थानीय तहमा विकास, सेवा प्रवाह र प्रशासनिक सुधारका विषयमा सक्रिय रहँदै आएका यादवको असामयिक निधनले नगरपालिकासँगै सम्पूर्ण धनुषा जिल्ला शोकमा डुबेको छ ।
उनको निधनको खबर फैलिएसँगै राजनीतिक दलका नेताहरू, स्थानीय जनप्रतिनिधि, कर्मचारी तथा सर्वसाधारणले सामाजिक सञ्जालमार्फत श्रद्धाञ्जली व्यक्त गरिरहेका छन् । मेयर यादवको अन्त्येष्टि र शोक कार्यक्रमबारे परिवार तथा नगरपालिकाबाट थप जानकारी आउने बताइएको छ ।

























