
काठमाडौँ । नेपाली कांग्रेसकी पूर्वकेन्द्रीय सदस्य आरजु राणाले डा. अमरेशकुमार सिंहविरुद्ध दायर गरेको गाली बेइज्जती मुद्दामा हार बेहोरेकी छिन्। जिल्ला अदालत काठमाडौँले राणाको दाबी नपुग्ने फैसला गरेको हो।
न्यायाधीश खिमानन्द भुसालको इजलासले राणाले दायर गरेको मुद्दामा दाबी नपुग्ने ठहर गर्दै सिंहको पक्षमा फैसला सुनाएको छ। आरजुले २०८० जेठमा पूर्व सांसद सिंहविरुद्ध आफ्नो प्रतिष्ठामा आँच पुर्याएको भन्दै मुद्दा हालेकी थिइन्।
सिंहले विभिन्न सार्वजनिक कार्यक्रम र टेलिभिजन अन्तर्वार्ताहरूमा राणालाई नेपालका ठूला भ्रष्टाचार काण्डहरूमा संलग्न रहेको आरोप लगाउँदै ‘पम्फादेवी’ को संज्ञा दिएका थिए। सोही अभिव्यक्तिले आफ्नो सार्वजनिक छवि बिगारेको र अफवाह फैलाएको राणाको दाबी थियो।
विगतमा कांग्रेसकै राजनीतिमा सक्रिय सिंहको २०७९ को चुनावमा टिकट काटिएपछि राणासँग सम्बन्ध बिग्रिएको थियो। सर्लाही ४ बाट स्वतन्त्र उम्मेदवार बनेर विजयी भएका सिंहले अहिले राष्ट्रिय स्वतन्त्र पार्टी (रास्वपा) बाट चुनावी मैदानमा उत्रिएका छन्।
आगामी फागुन २१ गते हुने चुनावमा सिंहले सर्लाही ४ मै कांग्रेस सभापति गगन थापासँग प्रतिस्पर्धा गर्दै छन्।

























