
काठमाडौँ । राष्ट्रिय प्राकृतिक स्रोत तथा वित्त आयोगले सार्वजनिक गरेको स्थानीय तहहरूको कार्यसम्पादन मूल्याङ्कनमा उपमहानगरपालिकाहरूको अवस्था निकै कमजोर देखिएको छ । ११ वटा उपमहानगरपालिकाहरूमध्ये रुपन्देहीको बुटवल उपमहानगरपालिका ६४.४४ अङ्क प्राप्त गर्दै पहिलो स्थानमा रहन सफल भएको छ ।
दाङका दुई उपमहानगरपालिकाहरू तुल्सीपुर ६१.५३ अङ्क र घोराही ६१.०८ अङ्कका साथ क्रमशः दोस्रो र तेस्रो स्थानमा रहेका छन् । यस्तै कैलालीको धनगढीले ५६.६० र बाँकेको नेपालगन्जले ५६.५४ अङ्क प्राप्त गरेका छन् । मकवानपुरको हेटौँडाले ५४.१३ र धनुषाको जनकपुरधाम उपमहानगरपालिकाले ५१.५८ अङ्क ल्याउँदै औसत कार्यसम्पादन गरेका छन् ।
केही उपमहानगरपालिकाहरूको अवस्था भने औसतभन्दा पनि तल देखिएको छ । सुनसरीको धरानले ४९.७६, बाराको कलैयाले ४९.५७ र जीतपुर सिमरा उपमहानगरपालिकाले ४८.३९ अङ्क मात्रै प्राप्त गरेका छन् । उपमहानगरपालिकाहरूमध्ये सुनसरीको इटहरी उपमहानगरपालिका सबैभन्दा कमजोर देखिएको छ । इटहरीले ३८.९६ अङ्क मात्र प्राप्त गरेको छ ।
आयोगले सार्वजनिक गरेको यो नतिजाले उपमहानगरपालिकाहरूको स्रोत परिचालन, बजेट व्यवस्थापन र योजना कार्यान्वयनको पक्ष फितलो रहेको प्रस्ट पारेको छ । कार्यसम्पादनमा आउने यस्तो अङ्कले स्थानीय तहले सङ्घीय सरकारबाट पाउने अनुदानको हिस्सामा समेत असर पार्ने गर्दछ ।

























