
काठमाडौं । नेपालका लागि नयाँ चिनियाँ राजदूत चाङ माओमिङ काठमाडौं आइसकेका छन् । शुक्रबार आइपुगेका उनले आफ्नो कार्यभार पनि सम्हालेका छन् ।
२३औँ राजदूतका रूपमा नेपालको भ्रमणमा आएका उनले २ देशबीचको सम्बन्धलाई नयाँ उचाइमा पुर्याउने प्रतिबद्धता व्यक्त गरे । राजदूत चाङले ‘चीन–नेपाल साझा भविष्य’ निर्माणका लागि हातेमालो गर्नुपर्नेमा जोड दिँदै जनमुखी कूटनीतिलाई प्राथमिकता दिने बताए ।
उनले बीआरआई अन्तर्गतका सहकार्यलाई सुदृढ बनाउने र चीनको १५औँ पञ्चवर्षीय योजनाले नेपालका लागि नयाँ विकास अवसर सिर्जना गर्ने विश्वास व्यक्त गरे । चाङले नेपालको राष्ट्रिय स्वतन्त्रता, सार्वभौमसत्ता र क्षेत्रीय अखण्डताको समर्थन गर्ने चीनको दृढ नीतिलाई स्मरण गर्दै नेपाली–चिनियाँ मित्रता र साझेदारीलाई आगामी दिनमा अझ मजबुत बनाउने बताए ।
उनले नेपालस्थित चिनियाँ नागरिकहरूको अधिकार र सुरक्षा सुनिश्चित गर्न दूतावास सक्रिय रहने प्रतिबद्धता पनि जनाए । अघिल्ला राजदूत चेन सोङको स्थानमा आएका चाङ, चीनको विदेश मन्त्रालयको एसियाली मामिला विभागमा उपमहानिर्देशक भएर काम गरिसकेका छन् र नेपाल मामिलामा अनुभवी मानिन्छन् ।
उनी नेपालको राजनीतिक परिवेश र भूराजनीतिक परिवर्तमा आफ्नो अनुभव र नेतृत्वमार्फत द्विपक्षीय सम्बन्धलाई नयाँ दिशा दिन तयार छन् । नेपाल–चीन सम्बन्धमा नयाँ अध्याय सुरु भएको यस अवसरमा राजदूत चाङको आगमनले द्विपक्षीय कूटनीतिक, आर्थिक र सांस्कृतिक साझेदारीलाई थप मजबुत बनाउने अपेक्षा गरिएको छ ।

























