
विराटनगर । झापामा आफैंले चलाएको मोटरसाइकलबाट लडेर १ जना युवकको मृत्यु भएको छ ।
अर्जुनधारा नगरपालिका–८ बौद्ध गुम्बानजिक शुक्रबार साँझ दुर्घटना भएको थियो । दुर्घटनामा अर्जुनधारा–८ का ३२ वर्षीय साजन गुरुङको मृत्यु भएको प्रहरीले जनाएको छ ।
प्रणामी मन्दिरदेखि शनिश्चरेतर्फ जाँदै गरेको गुरुङले चलाएको प्र १–०१–०१६ प ८८६४ नम्बरको मोटरसाइकल आफैं अनियन्त्रित भएर लडेको थियो । प्रहरीका अनुसार स्वास्थ्यमा असहज भएपछि रोक्ने क्रममा मोटरसाइकल लडेपछि उनी बेहोस भएका थिए ।
गुरुङलाई उपचारका लागि शनिश्चरे अस्पताल पठाइएको थियो । त्यहाँबाट थप उपचारका लागि बी एन्ड सी अस्पतालमा पठाएको थियो । अस्पताल पुर्याएको केही बेरमै उनलाई चिकित्सकले मृत घोषित गरिदिएको प्रहरीले जनाएको छ ।
मृतक गुरुङ उच्च रक्तचापको पुरानै बिरामी रहेको पाइएको छ । शवलाई पोस्टमार्टमका लागि प्रादेशिक अस्पताल भद्रपुर पठाएर घटनाको थप अनुसन्धान सुरु गरिएको प्रहरीले जनाएको छ ।

























