
विराटनगर । झापाको गौरादह नगरपालिका–४ मजुवास्थित भित्री सडक खण्डमा १ पुरुष मृत अवस्थामा फेला परेका छन् ।
आइतबार बिहान करिब ७ बजे स्थानीय बासिन्दाले मकैबारीको पानीमा घोप्टो परिरहेको अवस्थामा ५० वर्षीय भीमबहादुर दर्जीलाई देखेपछि प्रहरीलाई खबर गरेका थिए । प्रहरीका अनुसार मृतक भीमबहादुर सोही स्थानका स्थायी बासिन्दा हुन् ।
उनी सवार रहेको प्रदेश १–०१–०१६ प ८९२४ नम्बरको मोटरसाइकल घटनास्थल नजिकै क्षतिग्रस्त अवस्थामा फेला परेको छ । मोटरसाइकलको अवस्था र घटनाको प्रकृति हेर्दा सवारी दुर्घटनाका कारण पानीमा खसेर उनको मृत्यु भएको हुनसक्ने आशंका गरिएको छ ।
भीमबहादुर आइतबार राति मजुवास्थित साथीको घरबाट दुर्गाचोकतर्फ मोटरसाइकलमा जाँदै गरेको प्रहरीले पत्ता लागेको छ । त्यस क्रममा दुर्घटनामा परेर उनको मृत्यु भएको हुनसक्ने प्रहरीको अनुमान छ ।
प्रहरीले घटनास्थलको प्रकृति, मोटरसाइकलको अवस्था तथा वरपरको परिस्थितिका आधारमा दुर्घटना भएको प्रारम्भिक अनुमान गरेको हो । मोटरसाइकललाई नियन्त्रणमा लिएर प्रहरीले मृतकको शवलाई परीक्षणका लागि दमक अस्पताल पठाएको छ ।
प्रहरीले विभिन्न कोणबाट घटनाको अनुसन्धान सुरु गरेको छ । पोस्टमार्टम रिपोर्ट आएपछि मात्र मृत्युको यथार्थ कारणबारे स्पष्ट हुने प्रहरीको भनाइ छ ।

























