
विराटनगर । खोटाङको साकेला गाउँपालिका-४ मानेभन्ज्याङस्थित निर्माणाधीन सामुदायिक भवनमा बुधबार बिहान भीषण आगलागी भएको छ। बिहान करिब साढे ६ बजेतिर सुरु भएको आगलागीबाट ३ करोड १५ लाख ३६ हजार रुपैयाँ बराबरको क्षति भएको मुचुल्का उठाइएको छ। गाउँपालिकाको करिब ४ करोड रुपैयाँ लागतमा बनिरहेको उक्त भवनमा लागेको आगो स्थानीय बासिन्दा, कर्मचारी र प्रहरीको संयुक्त प्रयासमा करिब डेढ घण्टापछि नियन्त्रणमा आएको हो।
भवन निर्माणाधीन अवस्थामै रहे पनि यसलाई आवासका रूपमा प्रयोग गरिँदै आएको थियो। तीन तलासम्म ढलान भइसकेको सो भवनमा गाउँपालिका उपाध्यक्ष बिर्सिका राई, लेखापाल उत्तम आचार्य र सूचना अधिकारी डीएम चाम्लिङ बसोबास गर्दै आएका थिए। आगलागीका कारण भवनभित्र रहेका महत्वपूर्ण सामग्री र संरचनामा ठूलो क्षति पुगेको प्रमुख प्रशासकीय अधिकृत दुर्गाबहादुर राईले जानकारी दिए।
आगलागीको कारण अझै खुल्न सकेको छैन। जिल्ला प्रहरी कार्यालय खोटाङका सूचना अधिकारी राजु विष्टले घटनाबारे विस्तृत अनुसन्धान भइरहेको बताएका छन्। आगलागीबाट मानवीय क्षति नभए पनि ठूलो आर्थिक नोक्सानी भएको छ।

























