
काठमाडौं । नेकपा (एमाले) को भ्रातृ संगठनका रूपमा हालै गठन गरिएको ‘नेशनल भोलेन्टियर फोर्स’ले राष्ट्रिय स्वतन्त्र पार्टी (रास्वपा) विरुद्ध आक्रामक प्रतिवादमा उत्रिने चेतावनी दिएको छ।
रास्वपाका शीर्ष नेताहरूबाट एमाले नेतृत्वमाथि अनावश्यक लाञ्छना लगाइएको र पार्टीको झण्डा समेत जलाइएको भन्दै फोर्सले यस्तो चेतावनी दिएको हो।
फोर्सका प्रमुख कमाण्डर पुष्पराज श्रेष्ठले शुक्रबार एक वक्तव्य जारी गर्दै झण्डा जलाउने र द्वेष भड्काउने कार्यलाई ‘अराजक मानसिकता’ को संज्ञा दिएका छन्।
निर्वाचनको मुखमा रास्वपा कार्यकर्ताहरूबाट एमालेको झण्डा जलाउने जस्ता उत्तेजक कार्य भइरहेको दाबी गर्दै श्रेष्ठले राज्य संयन्त्रले त्यस्ता व्यक्तिहरूमाथि कारबाही नगरे फोर्स आफैँले सशक्त प्रतिवाद गर्ने बताए।
जेनजी आन्दोलन र त्यसपछिको राजनीतिक ध्रुवीकरणका बिच एमालेले आफ्नो नेतृत्व र नीतिको रक्षाका लागि भन्दै यो नयाँ दस्ता खडा गरेको थियो।
पछिल्ला केही दिनमा झापा र सुनसरी लगायतका क्षेत्रमा एमाले र रास्वपा कार्यकर्ताहरूबिच झडप र तनावका घटनाहरू सार्वजनिक भइरहेका छन्। यस्तोमा फोर्सको यो चेतावनीले चुनावी सुरक्षा र राजनीतिक मुठभेडको जोखिमलाई थप बढाएको छ।

























