सांकेतिक तस्बिरकाठमाडौं । नेपालमा पश्चिमी वायुको आंशिक प्रभाव कायमै रहेको छ । मौसम पूर्वानुमान महाशाखाका अनुसार यसको प्रभावले आज (आइतबार) देशका केही प्रदेशमा हल्का वर्षा र हिमपातको सम्भावना रहेको छ ।
हाल गण्डकी, कर्णाली र सुदूरपश्चिम प्रदेशका हिमाली तथा पहाडी भू–भागमा आंशिक बदली रहेको छ । बाँकी भू–भागमा मौसम मुख्यतया सफा रहेको छ ।
दिउँसो तराईका केही स्थानमा हुस्सु लाग्ने सम्भावना रहेको महाशाखाले जनाएको छ । हिमाली क्षेत्रमा सामान्य बदली र पहाडी क्षेत्रमा आंशिक बदली रहनेछ ।
कोशी, गण्डकी र बागमती प्रदेशका उच्च पहाडी तथा हिमाली भू–भागका थोरै स्थानमा हल्का वर्षासहित हिमपात हुन सक्ने अनुमान गरिएको छ । साथै कर्णाली प्रदेशका उच्च भू–भागका एक–दुई स्थानमा पनि समान प्रकृतिको मौसम रहने सम्भावना छ ।
आइतबार राति तराईका केही स्थानमा तुवाँलो लाग्न सक्नेछ । कोशी, बागमती, गण्डकी र कर्णाली प्रदेशका हिमाली भूभागमा आंशिक बदली रहनेछ भने अन्य क्षेत्रमा मौसम मुख्यतया सफा रहने मौसम पूर्वानुमान महाशाखाले जनाएको छ ।

























