
काठमाडौं । आगामी प्रतिनिधिसभा निर्वाचनका लागि नेपाली सेनाले देशभरका ४३ जिल्लामा निर्वाचन सामग्री पुर्याएको छ। निर्वाचन पूर्वको सुरक्षा तथा व्यवस्थापन जिम्मेवारी अन्तर्गत सेनाले अहिले विभिन्न जिल्लाहरूमा मतपत्र, मतपेटिका लगायतका सामग्री ढुवानी गरिरहेको छ।
नेपाली सेनाका प्रवक्ता एवं सहायक रथी राजाराम बस्नेतका अनुसार हालसम्म ४३ जिल्लामा सामग्री पुगिसकेको र बाँकी जिल्लाहरूमा लैजाने क्रम जारी छ। विकट भौगोलिक अवस्था भएका हिमाली जिल्लाहरूमा भने सेनाले हवाई साधनको प्रयोग गरेको छ।
हुम्ला, मुगु र डोल्पामा हवाई मार्गमार्फत निर्वाचन सामग्री ढुवानी गरिसकिएको छ। डोल्पामा आज आइतबार मात्रै नेपाली सेनाको स्काई ट्रकमार्फत मतपत्र, मतपेटिका, स्वस्तिक छाप र मतदाता नामावली लगायतका सामग्री पुर्याइएको हो। सेनाले अब मनाङ र मुस्ताङमा पनि हवाई साधनबाटै सामग्री लैजाने तयारी गरेको छ।
सरकारले निर्वाचन सुरक्षाका लागि एकीकृत सुरक्षा योजना अन्तर्गत सेनालाई परिचालन गरिसकेको छ। मतपत्र छपाइदेखि ढुवानीसम्मको सुरक्षामा सेना खटिएको छ।

























