
काठमाडौं। सर्वोच्च अदालतले पप्पु कन्सट्रक्सनका सञ्चालक हरिनारायण रौनियारसहित मुछिएको भ्रष्टाचार मुद्दामा नष्ट भएका मिसिलहरू पुनः झिकाउन आदेश दिएको छ। न्यायाधीशद्वय मनोजकुमार शर्मा र महेश शर्मा पौडेलको संयुक्त इजलासमा गत साउन २० गतेदेखि ‘हेर्दाहेर्दै’ मा रहेको यो मुद्दाको सुनुवाइका क्रममा यस्तो आदेश आएको हो।
भदौ २४ गते भएको आगलागीका कारण अदालतका कतिपय मिसिलहरू नष्ट भएका थिए। ती नष्ट भएका कागजात र मिसिलहरू पुनः प्राप्ति गरेपछि मात्र अदालतले सुनुवाइका लागि अर्को पेसी तोक्ने भएको छ। गुणस्तरहीन पुल बनाएको अभियोगमा विशेष अदालतले दोषी ठहर गरेपछि हरिनारायण रौनियारसहित ८ जनाले सर्वोच्चमा पुनरावेदन गरेका थिए।
विशेष अदालतको फैसलामा चित्त नबुझेको भन्दै अख्तियार दुरुपयोग अनुसन्धान आयोगले पनि ११ जनालाई प्रतिवादी बनाएर सर्वोच्चमा पुनरावेदन गरेको थियो। अहिले सर्वोच्चले दुवै पक्षको निवेदनलाई एकैसाथ राखेर सुनुवाइ प्रक्रिया अगाडि बढाइरहेको छ।
यसअघि विशेष अदालतले पप्पु कन्सट्रक्सनले गुणस्तरहीन पुल बनाएको ठहर गर्दै हरिनारायण र उनका छोरा सुमित रौनियारलाई दोषी देखाएको थियो। अदालतले उनीहरू दुवैलाई जनही साढे तीन करोड रुपैयाँ जरिवानाको सजाय सुनाएको थियो।

























