
काठमाडौं । पोखरा क्षेत्रीय अन्तर्राष्ट्रिय विमानस्थल निर्माणमा भएको भ्रष्टाचार सम्बन्धी चर्चित मुद्दामा विशेष अदालतले पूर्व अर्थसचिव मधु कुमार मरासिनीसहित पाँच जनालाई साधारण तारेखमा छाड्ने आदेश दिएको छ।
सोमबार विशेष अदालतका न्यायाधीशहरू नारायणप्रसाद पौडेल, हेमन्त रावल र विदुर कोइरालाको इजलासले आरोपितहरूलाई थुनामा राख्नुनपर्ने ठहर गर्दै बाहिरै बसेर मुद्दा लड्न पाउने गरी यो निर्णय गरेको हो।
साधारण तारेखमा छुट्नेहरूमा तत्कालीन सहसचिव एवं हालका सचिव मधु कुमार मरासिनी, नागरिक उड्डयन प्राधिकरणका तत्कालीन प्रबन्धक रामचन्द्र सुवेदी, पूर्व अर्थसचिव सुमन प्रसाद शर्मा, तत्कालीन उपसचिव प्रेम उपाध्याय र पूर्व सहसचिव मोहनकृष्ण सापकोटा रहेका छन्।
अख्तियार दुरुपयोग अनुसन्धान आयोगले चिनियाँ कम्पनी ‘चाइना सिएमसी इन्जिनियरिङ’ सँगको मिलेमतोमा लागत अस्वाभाविक रूपमा बढाएर भ्रष्टाचार गरेको दाबीसहित उनीहरू विरुद्ध मुद्दा दायर गरेको थियो।
विमानस्थलको लागत १७ करोड ९६ लाख डलरबाट बढाएर २४ करोड ४० लाख डलर पुर्याई राज्यलाई करिब ८ अर्ब ३६ करोड ७३ लाख रुपैयाँ नोक्सान पुर्याएको अख्तियारको अभियोग छ। यस मुद्दामा अन्य केही आरोपितहरूलाई भने अदालतले यसअघि नै धरौटीमा छाड्ने आदेश दिइसकेको छ।

























