मोरङ ४ र ६ मा एमालेसहितका उम्मेदवारको जमानत जफत

विराटनगर । प्रतिनिधिसभा सदस्य निर्वाचनअन्तर्गत मोरङको निर्वाचन क्षेत्र नम्बर ४ र ६ को अन्तिम मतपरिणाम सार्वजनिक भएको छ ।

मोरङ–४ को शुक्रबार राति र ६ को शनिबार बिहान मतपरिणाम घोषणा गरिएको हो । दुवै क्षेत्रबाट राष्ट्रिय स्वतन्त्र पार्टी (रास्वपा)का उम्मेदवार विजयी भएका छन् ।

Advertisement

मोरङ–४ बाट रास्वपाका सन्तोष राजवंशी ४० हजार ८३३ मतसहित विजयी हुँदा ६ बाट रास्वपाकी रुविना आचार्य ५५ हजार ५१३ मतसहित निर्वाचित भइन् । मोरङ ४ र ६ मा नेकपा (एमाले), नेपाली कम्युनिष्ट पार्टी (नेकपा), राष्ट्रिय प्रजातन्त्र पार्टी (राप्रपा) लगायतका दल र स्वतन्त्र गरेर ३१ जना उम्मेदवारको जमानत जफत भएको छ । जमानत जोगाउनका लागि कुल सदर मतको १० प्रतिशत मत ल्याउनुपर्ने हुन्छ ।

मोरङ–४ बाट कांग्रेसका महामन्त्रीसमेत रहेका गुरुराज घिमिरे रास्वपाका राजवंशीसँग पराजित भएका छन् । घिमिरेले १२ र ८१८ ल्याउँदा तेस्रो स्थानमा रहेका नेकपाका अमनलाल मोदीले १० हजार ७६२ मत पाए ।

कांग्रेसका घिमिरे र नेकपाका मोदी भने जमानत जोगाउन सफल भएका छन् । मोरङ–४ बाट एमालेका जीवन घिमिरे उम्मेदवार थिए । ६ हजार ९३३ मतमै रोकिएका एमालेका केन्द्रीय सदस्य घिमिरेको जमानत जोगिएन । एमालेका घिमिरे र राप्रपाका माधव आचार्यसहित १६ जना उम्मेदवारको जमानत जफत भएको छ ।

मोरङ–४ मा ७९ हजार ७७५ मत खसेकोमा ७४ हजार ५१९ सदर भएको थियो । ५ हजार २५६ मत बदर भएको छ । बदर मतको संख्या धेरै रहेको हो ।

त्यस्तै, मोरङ–६ मा रास्वपाकी आचार्यसँग नेपाली कांग्रेसका नेता डा. शेखर कोइराला पराजित भएका छन् । १२ हजार ८५० मत ल्याएका कोइरालाको मात्रै जमानत जोगिएको छ ।

तेस्रो स्थानमा रहेका एमालेका विनोद ढकालको जमानत नै जोगिएन । उनले ८ हजार ३१७ मत पाएका छन् । मोरङ–६ बाट एमालेका ढकाल, नेकपाका ओपेन्द्र रायसहित १५ जना उम्मेदवारको जमानत जफत भएको छ ।

ढकाललाई जमानत जोगाउनका लागि थोरै मत नपुगेको हो । नेकपाका राय १ हजार ७१६ मतमै रोकिएका थिए ।

मोरङ–६ मा ८९ हजार ८४७ मत खसेको थियो । खसेकोमध्ये ८५ हजार २३३ सदर र ४ हजार ६१६ मत बदर भएको छ । यो क्षेत्रमा पनि उल्लेख्य मत बदर भएको छ ।