भोजपुरमा ‘ध्रुवे हात्ती’को अप्रत्याशित उदय, एमाले सचिव शेरधनलाई पूर्वकार्यकर्ताको धक्का

Share this
703shares
मुलुकी खबर
मुलुकी खबर
clock२०८२ फागुन २४, आइतबार १९:१२
ध्रुवराज राई र शेरधन राई ।

भोजपुर । भोजपुरको प्रतिनिधिसभा निर्वाचन परिणामले जिल्लाको राजनीतिक समीकरणलाई मात्र नभएर पुरानो शक्ति संरचनालाई समेत गम्भीर रूपमा चुनौती दिएको छ ।

कोशी प्रदेशका संस्थापक मुख्यमन्त्री तथा नेकपा (एमाले)का केन्द्रीय सचिव शेरधन राईलाई पराजित गर्दै श्रम संस्कृति पार्टीका ध्रुवराज राई प्रतिनिधिसभा सदस्यमा निर्वाचित भएपछि भोजपुरको राजनीतिमा नयाँ अध्याय सुरु भएको हो । आफ्नै पूर्वनेता र शक्तिशाली राजनीतिक व्यक्तित्वलाई हराउँदै ध्रुवराज राईले पहिलोपटक संघीय संसद प्रवेश गरेका हुन् ।

मुख्य निर्वाचन अधिकृतको कार्यालय भोजपुरले सार्वजनिक गरेको अन्तिम मतपरिणामअनुसार ध्रुवराज राईले १६ हजार ६६३ मत प्राप्त गरे । उनका निकटतम प्रतिद्वन्द्वी एमालेका शेरधन राईले १४ हजार ७५० मत पाए । यसरी ध्रुवराजले १ हजार ९१३ मतान्तरले एमालेका प्रभावशाली नेता एवं पूर्वमुख्यमन्त्रीलाई पराजित गर्दै ऐतिहासिक जीत हासिल गरेका हुन् ।

नेपाली कांग्रेसका उम्मेदवार बालकृष्ण थापा ८ हजार ६७० मतसहित तेस्रो स्थानमा रहे । राष्ट्रिय स्वतन्त्र पार्टी (रास्वपा)का रमेशप्रसाद ओझाले ६ हजार १०२ मत प्राप्त गर्दै चौथो स्थान हासिल गरे भने नेपाली कम्युनिष्ट पार्टी (नेकपा)का अजम्बर राई काङमाङ ५ हजार ७२८ मतसहित पाँचौं स्थानमा रहेका छन् ।

यस निर्वाचनमा भोजपुरबाट १२ राजनीतिक दलका उम्मेदवार प्रतिस्पर्धामा उत्रिएका थिए । मतदान प्रतिशत भने अपेक्षाकृत कम रह्यो । कुल १ लाख २५ हजार ७६६ मतदाता रहेको भोजपुरमा ५७ हजार ५९९ मत खसेको थियो । कम मतदानका बीच आएको परिणामले जिल्लाको पुरानो राजनीतिक प्रवृत्तिमा परिवर्तन गरिदिएको छ ।

ध्रुवराजको विजयलाई सामान्य चुनावी परिणाम मात्र नभई ‘राजनीतिक कमब्याक’को रूपमा पनि हेरिएको छ । टेम्केमैयुङ गाउँपालिकाका पूर्वअध्यक्ष रहेका उनले २०७९ सालको स्थानीय तह निर्वाचनमा एमालेबाट उम्मेदवार बनेर अध्यक्ष पदमा पराजय भोगेका थिए । उनी २०७४ सालमा त्यही गाउँपालिकाको अध्यक्ष बनेका हुन् । २०७९ को हारपछि केही समय उनी सक्रिय राजनीतिबाट ओझेलमा परे ।

तर, संसदीय निर्वाचन आउँदै हर्क साम्पाङ नेतृत्वको श्रम संस्कृति पार्टी प्रवेश गरेर प्रतिनिधिसभाको टिकट लिए । अहिले उल्लेखनीय मतसहित विजयी हुँदै आफूलाई पुनः बलियो राजनीतिक खेलाडीका रूपमा स्थापित गर्न सफल भएका छन् ।

विशेषगरी ध्रुवराज कुनै समय शेरधन राईकै राजनीतिक अभियानका सक्रिय कार्यकर्ता थिए । एमालेभित्र लामो समय काम गरेका उनी पार्टीको विद्यार्थी संगठन अखिलको केन्द्रीय सचिवालय सदस्यसम्म पुगेका थिए । तर, पछिल्लो समय पार्टीभित्र नेतृत्वको शैली र जिम्मेवारी वितरणप्रति असन्तुष्टि बढ्दै गएपछि उनले एमाले परित्याग गरे ।

एमालेको महाधिवेशनताका पार्टीभित्र बढ्दो असन्तुष्टि र नेतृत्वको एकलौटी प्रवृत्तिको आरोप लगाउँदै उनले पार्टी छाडेका थिए । त्यसपछि उनी हर्क साम्पाङ नेतृत्वको श्रम संस्कृति पार्टीमा आबद्ध भएका हुन् । पार्टी परिवर्तन गरेको केही महिनामै जिल्लाकै सबैभन्दा शक्तिशाली राजनीतिक व्यक्तित्वलाई चुनावमा हराएपछि उनको उदयलाई राष्ट्रिय राजनीतिक वृत्तमा समेत चासोका साथ हेरिएको छ ।

ध्रुवराजको चुनावी अभियान पनि निकै फरक शैलीको थियो । उनले ठूला सभा र सम्मेलनभन्दा पनि गाउँगाउँमा पुगेर सिधा संवाद गर्ने रणनीति अपनाएका थिए । मोटरसाइकलमा स्पिकर बाँधेर जिल्ला दौडाहा गर्ने, जहाँ जति मानिस भेटिन्छन् त्यतिलाई आफ्ना योजना सुनाउने र साधारण जीवनशैली प्रदर्शन गर्ने उनको शैली मतदाताबीच प्रभावकारी बनेको थियो ।

उनले आफ्नो चुनावी अभियानमा भ्रष्टाचारविरुद्ध कडा अडान, इमानदारीपूर्ण राजनीति र भोजपुरको विकासलाई मुख्य मुद्दा बनाएका थिए । टेम्केमैयुङ गाउँपालिकाको अध्यक्ष हुँदा गरेका कामको उदाहरण दिँदै उनले आफूले विकास र पारदर्शितालाई प्राथमिकता दिएको दाबी गरेका थिए ।

साधारण जीवनशैलीका कारण पनि उनी मतदातामाझ लोकप्रिय बनेका थिए । एउटा छड्के झोला बोकेर हिँड्ने, औपचारिक कार्यक्रममा बाहेक सामान्य पोसाकमै देखिने र गाडीभन्दा मोटरसाइकलमै यात्रा गर्ने शैलीले उनी अन्य नेताभन्दा फरक देखिन्थे ।

ध्रुवराजको राजनीतिक पृष्ठभूमि पनि संघर्षपूर्ण छ । भोजपुरको नागीमा सामान्य परिवारमा जन्मिएका उनी विद्यार्थी राजनीतिबाट उदाएका नेता हुन् । भोजपुर बहुमुखी क्याम्पसमा दुईपटक स्वतन्त्र विद्यार्थी युनियन (स्ववियू) सभापति भएका उनले विद्यार्थी आन्दोलनमार्फत राजनीतिक पहिचान बनाएका थिए ।

२०६२–०६३ को जनआन्दोलनमा सक्रिय भूमिका खेलेका उनी आन्दोलनका क्रममा अग्रपंक्तिमा रहेर राजतन्त्रविरुद्ध नारा लगाउने र भाषण गर्ने नेताका रूपमा चिनिन्थे । त्यस कारण उनलाई भोजपुरमा ‘आन्दोलनको छोरा’ भन्ने उपनामसमेत दिइएको थियो ।

२०७४ सालको स्थानीय तह निर्वाचनमा उनले कांग्रेस, तत्कालीन माओवादी केन्द्र र संघीय समाजवादी फोरमको गठबन्धनलाई पराजित गर्दै टेम्केमैयुङ गाउँपालिकाको अध्यक्ष जितेका थिए । त्यतिबेला ठूलो गठबन्धनलाई हराएपछि समर्थकहरूले उनलाई ‘ध्रुवे हात्ती’ भन्ने उपमा दिएका थिए ।

ध्रुवे हात्ती भन्नाले एउटा विशिष्ट जातको, ठूलो, बलियो र शक्तिशाली जंगली हात्तीलाई जनाउँछ । २०७४ को स्थानीय निर्वाचनमा ठूला दल सम्मिलित गठबन्धनलाई सहजै पराजित गर्न सकेका कारण ध्रुवराजलाई समर्थकले शक्तिशाली र साहसी हात्तीको उपमा दिएका हुन् । अहिले फेरि शेरधनजस्तो शक्तिशाली नेतालाई हराए पुरानो उपमा कायम राख्दै उनी झन् चर्चित भएका छन् ।

यसपटकको चुनावमा उनलाई अर्को महत्त्वपूर्ण समर्थन पनि प्राप्त भएको थियो । पूर्वमन्त्री तथा प्रगतिशील लोकतान्त्रिक पार्टीका नेता सुदन किराँतीले ध्रुवराजलाई खुला समर्थन गरेका थिए । माओवादी केन्द्र विभाजनपछि अध्यक्ष पुष्पकमल दाहाल ‘प्रचण्ड’सँगको सहकार्य अन्त्य गरेका किराँतीले भोजपुरमा आफ्नो पार्टीबाट उम्मेदवार नउठाई ध्रुवलाई साथ दिएका थिए ।

किराँतीले ‘जेनजी पुस्ताको राजनीतिक चेतना र भोजपुरको समृद्धिको आकांक्षालाई सम्मान गर्दै’ ध्रुवलाई समर्थन गरेको बताएका छन् । उता उनीसँग पराजित एमाले नेता शेरधनका लागि भने यो लगातार दोस्रो संसदीय हार हो । यसअघि २०७९ सालको प्रतिनिधिसभा निर्वाचनमा पनि उनी पूर्वमाओवादी केन्द्रका सुदन किराँतीसँग २ हजार ३८५ मतान्तरले पराजित भएका थिए ।

भोजपुरबाट छैटौँपटक चुनावी मैदानमा उत्रिएका शेरधनले २०५६ सालको प्रतिनिधिसभा निर्वाचन, २०७० सालको दोस्रो संविधानसभा निर्वाचन र २०७४ सालको प्रदेशसभा निर्वाचन जितेका थिए । तर, २०६४ सालको संविधानसभा, २०७९ सालको प्रतिनिधिसभा र अहिलेको निर्वाचनमा भने पराजित हुनु परेको छ ।

परिणाम सार्वजनिक भएपछि शेरधनले लोकतान्त्रिक अभ्यासमा आएको जनादेशलाई सम्मान गर्दै मतदाताप्रति आभार व्यक्त गरेका छन् । सामाजिक सञ्जालमार्फत सन्देश दिँदै उनले भोजपुरको विकासका लागि आफूले देखेको सपना अधुरै रहे पनि जिल्लाप्रतिको जिम्मेवारीबाट कहिल्यै टाढा नहुने बताएका छन् ।

उनले आफ्ना समर्थक र कार्यकर्तालाई निर्वाचन परिणामबाट निराश नहुन आग्रह गर्दै विजयी उम्मेदवार ध्रुवराजलाई बधाई तथा सफल कार्यकालको शुभकामना पनि दिएका छन् । भोजपुरको निर्वाचन परिणामले एक निर्वाचन क्षेत्रको नेतृत्व परिवर्तन मात्र नगरेर पुरानो शक्तिकेन्द्रको पराजय र नयाँ राजनीतिक शक्तिको उदय गराएको छ ।

निर्वाचन परिणामलाई विशेषगरी युवा पुस्ता, वैकल्पिक राजनीति र स्थानीय नेतृत्वको उदयलाई मतदाताले दिएको समर्थनका रूपमा हेरिएको छ । भोजपुरको राजनीतिक इतिहासमा शक्तिशाली मानिएका शेरधनलाई आफ्नै पूर्वकार्यकर्ताले पराजित गरिदिएका छन् ।

ध्रुवराजलाई राजनीतिक रुपमा संगठित गराउने र अगाडि बढाउने काम शेरधनले नै गरेका हुन् । अहिले शेरधनको साथ छाडेर नयाँ दलमा आबद्ध भई अघि बढ्ने क्रममा उनको अप्रत्याशित उदयले भोजपुरमा व्यापक चर्चा पाइरहेको छ । राष्ट्रिय राजनीतिमा पनि नयाँ बहस र समीकरण जन्माउने संकेत दिएको छ ।

तपाइको प्रतिक्रिया
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
दानबहादुर कार्कीको रिटमा बुधबार सर्वोच्चमा सुनुवाइ हुँदै
© 2024 Muluki Khabar. All Rights Reserved. Design & Develop By: Indesign Media Pvt. Ltd.