पराजित भएपछि मतदातालाई धन्यवाद र रास्वपालाई बधाई

Share this
760shares
मुलुकी खबर
मुलुकी खबर
clock२०८२ फागुन २५, सोमबार १५:२६

काठमाडौंं। प्रगतिशील लोकतान्त्रिक पार्टीका नेता जनार्दन शर्माले फागुन २१ गते सम्पन्न प्रतिनिधिसभा निर्वाचनमा सहभागी रुकुम पश्चिमका मतदातालाई धन्यवाद दिएका छन्।

सामाजिक सञ्जाल फेसबुकमार्फत एक भिडियो सन्देश जारी गर्दै उनले निर्वाचनबाट विजयी भएका उम्मेदवारहरूलाई बधाई दिनुका साथै आफू पदमा रहे पनि नरहे पनि जनताको सेवामा सधैँ समर्पित रहने प्रतिबद्धता जनाएका हुन्। शर्माले तोकिएकै समयमा निर्वाचन सम्पन्न गराएकोमा प्रधानमन्त्री सुशील कोइराला, निर्वाचन आयोग, सुरक्षा निकाय र कर्मचारीहरूलाई धन्यवाद दिए।

रुकुमेली जनताको रोजाइमा परेर निर्वाचित भएका गोपाल शर्मालाई बधाई दिँदै उनले जनताका आशा र अपेक्षा पूरा गर्न सुझाव दिए। निर्माणाधीन परियोजनाहरूको सम्पन्नता, गरिब र बेरोजगारका समस्या समाधान गर्दै सुशासनयुक्त र समृद्ध रुकुम बनाउने दिशामा अगाडि बढ्न उनले विजयी उम्मेदवारलाई आग्रह गरे।

रुकुमको समग्र विकासका लागि जिल्लाका सम्पूर्ण राजनीतिक दलहरू एकजुट हुनुपर्नेमा जोड दिँदै उनले सामाजिक न्याय र समानतायुक्त समाज निर्माण गर्न सबैलाई आह्वान गरे।

राष्ट्रिय राजनीतिको सन्दर्भमा बोल्दै शर्माले नेपाली मतदाताले राजनीतिक अस्थिरताको मानसिकतालाई यसपटक परास्त गरेको बताए। उनले ऐतिहासिक जनमत प्राप्त गरेको भन्दै राष्ट्रिय स्वतन्त्र पार्टी (रास्वपा) का सभापति रवि लामिछाने तथा नेता बालेन्द्र शाहलगायतको टोलीलाई विशेष बधाई दिए।

जनताको यो ऐतिहासिक जनमतलाई आत्मसात गर्दै सुशासन र आर्थिक विकासको बाटोमा अघि बढ्न उनले रास्वपालाई सुझाव दिए। रुकुमेली जनताले विगतदेखि नै आफूलाई गर्दै आएको विश्वासप्रति ऋणी रहेको बताउँदै उनले आगामी दिनमा पनि निरन्तर जनताकै सेवामा समर्पित रहने प्रण गरे।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.