प्रदेशहरूमा ‘अटिजम नमुना विद्यालय’ स्थापनाको तयारी

काठमाडौं । सरकारले अटिजम भएका बालबालिकालाई लक्षित गर्दै सातै प्रदेशमा ‘अटिजम नमुना विद्यालय’ स्थापना गर्ने तयारी अघि बढाएको छ ।

विश्व अटिजम सचेतना दिवसको अवसरमा बिहीबार शिक्षा, विज्ञान तथा प्रविधि मन्त्रालयको समन्वयमा भएको बैठकले प्रत्येक प्रदेशमा एक–एक वटा नमुना विद्यालय स्थापना गर्ने निर्णय गरेको हो । शिक्षा, विज्ञान तथा प्रविधिमन्त्री सस्मित पोखरेलको अध्यक्षतामा भएको बैंठकमा स्वास्थ्य तथा जनसंख्यामन्त्री निशा मेहतालगायत सम्बन्धित मन्त्रालयका अधिकारीहरूको सहभागिता रहेको थियो ।

बैठकले अटिजम तथा बौद्धिक अपांगता भएका बालबालिकाका लागि प्रदेशस्तरमै विशेष आवासीय विद्यालय सञ्चालन गर्ने योजना अघि बढाउने निर्णय गरेको हो । सरकारले प्रस्ताव गरेको योजनाअनुसार स्थापना गरिने विद्यालयहरूलाई शैक्षिक संस्थामा सीमित नराखी स्वास्थ्य, मनोसामाजिक परामर्श, थेरापी सेवा र जीवन सीप विकास समेटिएको समग्र सेवा केन्द्रका रूपमा विकास गरिनेछ ।

बालबालिकाको सिकाइलाई प्रभावकारी बनाउन आवासीय सुविधासहितको संरचना निर्माण गर्ने तयारी पनि गरिएको छ । मन्त्री पोखरेलले अटिजम भएका बालबालिकालाई सहज र प्रभावकारी सेवा उपलब्ध गराउने उद्देश्यले कार्यक्रम अघि बढाइएको जानकारी दिँदै कार्यान्वयनलाई तीव्रता दिइने बताए ।

बैठकमा मन्त्रालयहरूबीच समन्वय मजबुत बनाउन प्राविधिक समिति गठन गर्ने निर्णय पनि गरिएको छ । जसले विस्तृत अवधारणा–पत्र तयार गर्नेछ । सरकारले हाल सञ्चालनमा रहेका तथा निर्माणाधीन विशेष शिक्षा कार्यक्रमहरूको प्रगति समीक्षा पनि गरेको छ । सहभागीहरूले दक्ष जनशक्ति, निरन्तर बजेट र स्पष्ट कार्यान्वयन ढाँचा आवश्यक रहेको सुझाव दिएका छन् ।