बालेनको सचिवालय २६ सदस्यीय

Share this
661shares
मुलुकी खबर
मुलुकी खबर
clock२०८२ चैत २१, शनिबार ०७:१४

काठमाडौं । बालेन्द्र शाह (बालेन) नेतृत्वको सरकारले गठन गरेको सचिवालय अहिले राजनीतिक र प्रशासनिक वृत्तमा चासोको विषय बनेको छ ।

प्रधानमन्त्री बनेपछि उनले निर्माण गरेको २६ सदस्यीय सचिवालयलाई ‘पावर टिम’का रूपमा हेरिएको छ । जसमा नीति निर्माणदेखि सञ्चार व्यवस्थापनसम्मका प्रभावशाली व्यक्तिहरू समेटिएका छन् ।

चैत १३ गते प्रधानमन्त्री बनेका शाहले सुरुमा २५ सदस्यीय सचिवालय गठन गरेका थिए । तर, आवश्यकताअनुसार संरचना विस्तार गर्दै उनले हाल यसलाई २६ सदस्यीय बनाएका छन् । अझै पनि आवश्यक परे थप सदस्य समावेश गर्न सकिने प्रधानमन्त्रीको सचिवालयले जनाएको छ ।

सचिवालयको शीर्ष तहमा रहेका व्यक्तिहरूले सरकारको नीति, रणनीति र निर्णय प्रक्रियामा प्रत्यक्ष प्रभाव पार्ने अपेक्षा गरिएको छ । प्रमुख सल्लाहकारमा कुमार व्यञ्जनकार (कुमार बेन) नियुक्त भएका छन् भने राजनीतिक सल्लाहकारको जिम्मेवारी असीम शाहलाई दिइएको छ ।

त्यसैगरी नीति, प्रशासन तथा सुशासन सल्लाहकारमा सुदीप ढकाल र सूचना तथा सञ्चार प्रविधि सल्लाहकारमा विवेक मिश्र रहेका छन् । यी चार पदलाई प्रधानमन्त्रीको ‘ब्रेन टिम’का रूपमा लिइएको छ । जसले सरकारको दीर्घकालीन दिशा तय गर्ने काम गर्नेछन् ।

प्रधानमन्त्रीको दैनिक कार्य सञ्चालन र व्यवस्थापनका लागि स्वकीय सचिवालयलाई पनि सशक्त बनाइएको छ । प्रमुख स्वकीय सचिवमा सुवाष शर्मा नियुक्त भएका छन् भने स्वकीय सचिवमा नवीन भण्डारी रहेका छन् । विकास परियोजनासम्बन्धी काम हेर्न स्वकीय सहसचिवका रूपमा सञ्जीव पाण्डे नियुक्त गरिएका छन् ।

त्यस्तै, स्वकीय उपसचिवमा प्रकृति ढकाल र विशाल अधिकारी छन् । प्रधानमन्त्रीको सार्वजनिक छवि र गतिविधि व्यवस्थापनका लागि फोटोग्राफरका रूपमा विनय शाक्य, प्रेस सहजकर्ताका रूपमा सुरेन्द्र बजगाईं तथा भिडियोग्राफरका रूपमा अमृत पाण्डे नियुक्त भएका छन् । प्रशासनिक सहयोगका लागि अनुप थापा मगर र ऋषि थापा कार्यरत छन् ।

निजी सचिवालयतर्फ पनि अनुभवी र विविध क्षेत्रका व्यक्तिहरू समेटिएका छन् । सहसचिवमा प्रदीप परिवार, उपसचिवमा तुलाराज सुनुवार तथा शाखा अधिकृतमा चूडामणि बस्याल, डा. गणेशप्रसाद खनाल र लीलाराज काफ्ले रहेका छन् । त्यस्तै, नीरज महर्जन, नूतन गौतम, भूपध्वज राई, राजकृष्ण महर्जन, बलराम खड्का र दिनेश श्रेष्ठ पनि सचिवालयमा आबद्ध छन् ।

सचिवालयलाई थप मजबुत बनाउन प्रधानमन्त्री शाहले प्रेस तथा अनुसन्धान विज्ञका रूपमा पत्रकार दीपा दाहाललाई नियुक्त गरेका छन् । सञ्चार रणनीति, मिडिया व्यवस्थापन र अनुसन्धानमा उनको भूमिका महत्वपूर्ण रहने बताइएको छ । यस नियुक्तिले सरकारको सन्देश प्रवाह र सार्वजनिक छविमा सुधार ल्याउने अपेक्षा गरिएको छ ।

राजनीतिक रूपमा पनि सचिवालय गठनलाई अर्थपूर्ण रूपमा हेरिएको छ । प्रतिनिधिसभामा बहुमतसहित सरकार बनाएको राष्ट्रिय स्वतन्त्र पार्टी (रास्वपा)को नेतृत्वमा बनेको सरकारले आफ्नो प्राथमिकता कार्यान्वयन गर्न सक्षम टिम तयार पारेको सन्देश दिन खोजेको छ ।

फागुन २१ गते सम्पन्न निर्वाचनबाट रास्वपा १८२ सिटसहित सबैभन्दा ठूलो दल बनेको थियो । जसले सरकार गठनमा स्पष्ट बहुमत सुनिश्चित गरेको थियो ।

यसअघि विभिन्न सरकारहरूले पनि सचिवालय संरचना निर्माण गरेका थिए । तर, बालेनको टिमलाई अपेक्षाकृत फरक र ‘परफर्मेन्स–ओरियेन्टेड’ बनाउने प्रयास भएको दाबी गरिएको छ ।

अघिल्लो प्रधानमन्त्री सुशीला कार्की नेतृत्वको सचिवालयमा सीमित संरचना र विशिष्ट पदहरू मात्रै थिए । तर, अहिलेको सचिवालयमा प्राविधिक, सञ्चार, प्रशासनिक र अनुसन्धान क्षेत्रलाई सन्तुलित रूपमा समेटिएको देखिन्छ ।

प्रधानमन्त्रीको सल्लाहकार तथा सचिवालय व्यवस्थापन कार्यविधि, २०७४ अनुसार प्रधानमन्त्रीले आफ्नो सचिवालयमा अधिकतम ६६ जनासम्म राख्न सक्ने व्यवस्था भए पनि शाहले सुरुआती चरणमै सीमित तर प्रभावकारी टिम बनाउने रणनीति अपनाएको देखिन्छ । यसले अनावश्यक जनशक्तिभन्दा कार्यक्षमता र परिणाममा जोड दिने संकेत गरेको विश्लेषकहरूको भनाइ छ ।

समग्रमा, बालेनको २६ सदस्यीय सचिवालय प्रशासनिक संरचना मात्र नभएर सरकारको कार्यशैली, प्राथमिकता र दृष्टिकोण झल्काउने ‘पावर टिम’का रूपमा उभिएको छ । अब यो टिमले अपेक्षाअनुसार परिणाम दिन सक्छ कि सक्दैन भन्नेमा चासो बढेको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.