बिपी स्मृति अस्पतालमा डा. शेखरको आग्रह: ‘दोष होइन, अब समाधान खोजौँ’

काठमाडौं । नेपाली कांग्रेसका नेता डा. शेखर कोइरालाले बिपी स्मृति सहकारी अस्पताललाई नयाँ गति र सोचका साथ अगाडि बढाउनुपर्नेमा जोड दिएका छन् ।

अस्पतालको १८ औँ वार्षिक साधारण सभालाई सम्बोधन गर्दै उनले संस्थाभित्र जारी आरोप–प्रत्यारोपको शृङ्खला अन्त्य गरी सहकार्यको बाटो रोज्न सबैलाई आह्वान गरे ।

कार्यक्रमका प्रमुख अतिथि डा. कोइरालाले संस्थाले १८ वर्षको लामो यात्रा तय गरिसक्दा पनि अपेक्षित सफलता हासिल गर्न नसकेको यथार्थ स्वीकार गरे । ‘संस्थाले १८ वर्षमा जति फड्को मार्नुपथ्र्याे, त्यति हुन सकेको छैन,’ उनले भने, ‘अब विगतलाई कोट्याएर एक अर्कालाई दोष लगाउने समय होइन । कसैलाई गाली गरेर संस्था उक्सिँदैन, अबको बाटो भनेको कमजोरी सुधार्दै अगाडि बढ्नु नै हो ।’

उनले अस्पताल सुधारका लागि गठित कार्यदललाई पनि ‘कसले के गरेन’ भन्नुभन्दा पनि ‘अब के गर्ने’ भन्ने ठोस योजना ल्याउन आग्रह गरे । डा. कोइरालाले थपे, ‘अल्झिने समय छैन, हाम्रो ध्यान संस्थालाई कसरी राम्रो बनाउने भन्नेमै केन्द्रित हुनुपर्छ ।’

अस्पतालका पूर्वअध्यक्ष डा. केदार नर्सिङ केसीले संस्थालाई राजनीतिक चस्माले हेर्न नहुने तर्क गरे । अस्पताल एउटा विशुद्ध सामाजिक उत्तरदायित्व बोकेको संस्था भएको चर्चा गर्दै उनले राजनीतिक खिचातानीले संस्थाको मनोबल गिराउने चेतावनी दिए ।

‘यो राजनीति गर्ने थलो होइन, सामाजिक सेवा गर्ने मन्दिर हो,’ डा. केसीले भने, ‘हामीमा दृढ इच्छाशक्ति र सामाजिक मनोबल छ भने संस्थालाई संकटबाट जोगाउन सकिन्छ । आत्तिनुपर्ने अवस्था छैन, मात्र काम गर्ने शैलीमा सुधार आवश्यक छ ।’

डा. केसीले संस्था सुधार्न ठुला छानबिन समितिभन्दा पनि सञ्चालक र सदस्यहरूको सफा नियत महत्त्वपूर्ण हुने बताए । उनले भने, ‘विगतका तिता–मिठा अनुभव बिर्सिएर सबै एकजुट हुने हो भने तीन जना मिलेर पनि संस्थालाई उचाइमा पुर्‍याउन सकिन्छ । आफू जहाँ रहे पनि यो अस्पतालसँगको आबद्धता र भावनात्मक सम्बन्ध सदैव अटुट रहने छ ।’

साधारण सभामा सहभागी अन्य वक्ताहरूले पनि अस्पतालको सेवालाई गुणस्तरीय बनाउँदै बिपी कोइरालाको नाम र आदर्शलाई जोगाउन अस्पताललाई नमुना स्वास्थ्य संस्थाका रूपमा विकास गर्नुपर्नेमा जोड दिएका थिए ।