श्रममन्त्री पदमुक्त, स्वास्थ्य मन्त्रीलाई सचेत गराइयाे

काठमाडौं । प्रधानमन्त्री वालेन्द्र शाहले विवादमा तानिएका श्रम, रोजगार तथा सामाजिक सुरक्षामन्त्री दीपककुमार साहलाई पदमुक्त गरेका छन् । स्वार्थ बाझिने काम गरेको भन्दै राष्ट्रिय स्वतन्त्र पार्टी (रास्वाप) ले साहलाई पदमुक्त गर्न पत्र पठाएकाे थियाे । त्यसपछि प्रधानमन्त्रीले बिहीबार पदमुक्त गरेका हुन् ।

पार्टी सभापति रवि लामिछानेले साहलाई पदमुक्त गर्नका लागि प्रधानमन्त्रीलाई पत्र पठाएकाे पत्रमा भनिएको छ,‘श्रम, रोजगार तथा सामाजिक सुरक्षा मन्त्री माननीय दीपक कुमार साहले मन्त्रीमा बहाल रहँदा पदीय मर्यादाको दुरुपयोग गरी श्रीमतीलाई लामो समय देखि निष्क्रिय राखिएको स्वास्थ्य बिमा बोर्डको सदस्यमा नियमित गराउने कार्य गरेको व्यहोरा पार्टीको केन्द्रीय अनुशासन आयोगको अध्ययनबाट देखिएको र आयोगबाट आवश्यक कारवाहीको लागि मिति २०८२ चैत्र २५ गते पत्र प्राप्त भएको जानकारी गराउँदछु । यसबाट पार्टीको छवि, आदर्श, सिद्धान्त र मर्यादामाथि आँच आउने देखिएको छ ।’

Advertisement

पार्टीले गम्भीर विषयमा आफ्नो जिम्मेवारीमा अपेक्षित गाम्भीर्यता नदेखिएको भन्दै स्वास्थ्य तथा जनसंख्या मन्त्री माननीय निशा मेहतालाई पनि सचेत गराउन सिफारिस गरेको छ ।

मन्त्री साह एकपछि अर्को विवादमा मुछिएका घटनाहरु सार्वजनिक भएपछि प्रधानमन्त्री शाहले चासो देखाएर रास्वपाका नेताहरुसँग छलफल गरेका थिए । गत चैत १३ गते मन्त्री नियुक्त भएका आफ्नै श्रीमती जुनु श्रेष्ठलाई स्वास्थ्य बिमा बोर्डमा हाजिर गराएका थिए ।

साह महोत्तरी–२ का प्रत्यक्ष निर्वाचित सांसद हुन् ।