
काठमाडौं । नेपाली कम्युनिस्ट पार्टी (नेकपा) ले उपसभामुखको निर्वाचनमा श्रम संस्कृति पार्टीकी उम्मेदवार रुबीकुमारी ठाकुरलाई समर्थन गर्ने निर्णय गरेको छ। शुक्रबार प्रतिनिधिसभामा हुन लागेको निर्वाचनमा नेकपाले ठाकुरको पक्षमा मतदान गर्ने पार्टी निर्णय भएको सांसद रमेश मल्लले जानकारी दिए।
सांसद मल्लका अनुसार सभामुखजस्तै उपसभामुख पद पनि सर्वसम्मत गराउने प्रयास सफल हुन नसकेपछि पार्टीले ठाकुरलाई समर्थन गर्ने निर्णय लिएको हो। ‘सभामुखजस्तै उपसभामुख पनि सर्वसम्मत गर्न सकेको भए धेरै राम्रो हुने थियो, तर त्यो सम्भव भएन,’ मल्लले भने, ‘हाम्रो पार्टीले रुबीकुमारी ठाकुरलाई समर्थन गर्छ। राजनीतिमा मूल्य र इमानको ठूलो महत्त्व हुन्छ।’
श्रम संस्कृति पार्टीबाट उम्मेदवार बनेकी ठाकुरलाई सत्तापक्षीय दल राष्ट्रिय स्वतन्त्र पार्टी (रास्वपा) ले पनि समर्थन गरिसकेको छ। उपसभामुखका लागि ठाकुर र राप्रपाकी सरस्वती लामाबीच प्रतिस्पर्धा हुँदैछ। निर्वाचनमा नेकपाका १७ सांसदहरूको मत निर्णायक रहने देखिएको छ।

























