मन्त्रीहरूको सम्पत्ति स्रोत छानबिनको माग गर्दै प्रदर्शन

काठमाडौं । राष्ट्रिय स्वतन्त्र पार्टी (रास्वपा)को एकल सरकारका मन्त्रीहरूले सार्वजनिक गरेको सम्पत्ति विवरणलाई लिएर विभिन्न प्रश्न उठ्न थालेको छ ।

अत्यधिक सम्पत्ति देखिएको भन्दै त्यसको स्रोत छानबिन हुनुपर्ने माग पनि बढ्न थालेको छ । मन्त्रीहरूले सार्वजनिक गरेको सम्पत्ति विवरण अस्वाभाविक रहेको भन्दै विभिन्न पक्षबाट शंका व्यक्त भइरहेका बेला अखिल क्रान्तिकारीले काठमाडौंको माइतीघरमा प्रदर्शन गर्दै सम्पत्तिको स्रोत सार्वजनिक गर्नुपर्ने माग अघि सारेको छ ।

Advertisement

प्रदर्शनका क्रममा सहभागीहरूले विभिन्न नारा लेखिएका प्ले कार्डहरू बोकेका थिए । उनीहरूले मन्त्रीहरूको सम्पत्ति विवरण मात्र नभएर त्यसको आम्दानीको स्रोत पनि स्पष्ट पारिनुपर्ने माग राखेका थिए । प्रदर्शनकारीहरूले सम्पत्ति विवरणमा पारदर्शिता नदेखिएको भन्दै स्वतन्त्र छानबिन आवश्यक रहेको बताएका छन् ।

प्रदर्शनमा देखाइएका प्ले कार्डहरूमा सरकार र मन्त्रीहरूमाथि लक्षित आलोचनात्मक नारा लेखिएका थिए । सहभागीहरूले मन्त्रीहरूको सम्पत्तिको स्रोतका बारेमा अनुसन्धान गरी सत्य तथ्य सार्वजनिक गर्न सरकारलाई आग्रह गरेका छन् ।

उनीहरूले सार्वजनिक पद धारण गरेका व्यक्तिहरूको सम्पत्तिमा पारदर्शिता अनिवार्य हुनुपर्ने भन्दै त्यसलाई गम्भीर रूपमा लिनुपर्ने धारणा समेत राखेका छन् । प्रधानमन्त्री बालेन्द्र शाह (बालेन)सहित मन्त्रीहरुको सम्पत्ति सार्वजनिक गरिएपछि सामाजिक तथा राजनीतिक वृत्तमा बहस चुलिँदै गएको छ ।