बालेन सरकारसँग हर्क साम्पाङ आक्रोशित

विराटनगर । प्रतिनिधिसभा सदस्य तथा श्रम संस्कृति पार्टीका अध्यक्ष हर्क साम्पाङ (हर्कराज राई) सरकारसँग निक्कै आक्रोशित देखिएका छन् ।

उनले बालेन्द्र शाह (बालेन) नेतृत्वको सरकारको तीव्र आलोचना गरिरहेका हुन् । साम्पाङले सिन्धुलीको लोकमार्ग र रोसी खोलाले बगाएर सडक अवरुद्ध भएको विषयदेखि लिएर सुकुम्वासी बस्तीमा डोजर चलाइएको घटनासम्मको प्रसंगलाई जोड्दै सामाजिक सञ्जाल फेसबुकमार्फत सरकारप्रति तीव्र असन्तुष्टि र आक्रोश व्यक्त गरेका छन् ।

Advertisement

उनले विभिन्न समयमा गरेका फेसबुक पोस्टहरूमा वर्तमान सरकारलाई लक्षित गर्दै कठोर शब्द प्रयोग गरेका छन् । जनताको समस्या समाधानमा असफल रहेको सरकार सुकुम्वासी बस्ती हटाउने जस्ता कारबाहीमा मात्रै सक्रिय देखिएको आरोप साम्पाङले लगाएका छन् ।

साम्पाङले सिन्धुलीको लोकमार्ग र रोसी खोलाले सडक बगाएर यातायात ठप्प भएको अवस्था सरकारका निकायहरूले बेवास्ता गरेको जस्तो देखिएको टिप्पणी गरेका छन् । तर, अर्कोतर्फ सुकुम्वासी बस्तीमा डोजर चलाएर गरिब र कमजोर वर्गमाथि राज्य कठोर बनेको उनको आरोप छ ।

उनका पोस्टमा सुकुम्वासी बस्ती हटाउने घटनामात्र नभएर मुक्कुम्लुङ क्षेत्रसँग सम्बन्धित विकास परियोजना र संरक्षणको विषय पनि उठाइएको छ । उनले कञ्चनजंघा आरक्षण क्षेत्रलाई नै असर पुग्ने गरी गुराँसघारी मासेर केवलकार परियोजना अघि बढाउन खोज्नेहरूलाई राज्यले संरक्षण गरिरहेको तर भूमिहीन र सुकुम्वासीमाथि कडा व्यवहार गरिएको भन्दै असन्तुष्टि जनाएका छन् ।

साम्पाङले सुरक्षा निकायको भूमिकाबारे पनि प्रश्न उठाएका छन् । उनले ठूलो संख्यामा प्रहरी र सेना परिचालन हुनु जनताको सुरक्षाभन्दा पनि शक्तिशाली समूह वा सत्तासँग नजिक भएकाहरूको हितमा केन्द्रित भएको देखिने बताए । उनले सामाजिक सञ्जालमा ‘सीमामा खटिनुपर्ने सेना बस्ती खाली गराउने काममा देखिनु उचित हो कि होइन ?’ भन्ने प्रश्न पनि उठाएका छन् ।

यस्तै, उनले राज्य संयन्त्र र सुविधा वितरण प्रणालीप्रति पनि असन्तुष्टि व्यक्त गरेका छन् । ‘करोडौंको महलमा सुविधा र सुरक्षा, तर सडकमा जनता बेघर’ भन्ने आशयका पोस्टहरु उनले गरिरहेका छन् । साम्पाङले राज्य असन्तुलनको प्रतीकका रूपमा धेरै विषय उठान गरेका छन् ।

सुकुम्वासी बस्ती हटाउने क्रममा भएको डोजर प्रयोगपछि त्यहाँका बासिन्दा प्रभावित भएको दृश्यहरू सार्वजनिक भएपछि सामाजिक सञ्जालमा व्यापक बहस सुरु भएको छ । घरबार गुमाएका परिवार, बालबालिका र वृद्धवृद्धा रोइरहेको दृश्यले मानवीय संवेदनाको प्रश्न उठाएको छ । यही घटनालाई लिएर हर्क साम्पाङले सरकारको आलोचना तीव्र पारेका हुन् ।

सुकुम्वासी बस्ती हटाउने विषयमा बालेन सरकारको भूमिकालाई लिएर उनी निक्कै असन्तुष्ट देखिएका छन् । साम्पाङको पछिल्लो अभिव्यक्तिले राज्यको विकास प्राथमिकता, भूमि व्यवस्थापन, सुकुम्वासी समस्या समाधानमा सरकार चुकेको भान गराउँछ ।

एकातर्फ प्राकृतिक विपद् र सडक अवरुद्धजस्ता समस्या तत्काल समाधान नहुँदा नागरिक प्रभावित भइरहेका छन् भने अर्कोतर्फ अव्यवस्थित बसोबास र सरकारी जग्गा अतिक्रमणका विषयमा पनि कारबाही भइरहेका छन् । तर, पानी परिरहेका बेला सरकारले बस्तीमा डोजर चलाएपछि सुकुम्वासीहरुको बिचल्ली भएको छ ।