डाक्टरको दर्ता खारेजी

काठमाडौं । नेपाल मेडिकल काउन्सिलले विदेशी राहदानी लिएका १९ जना नेपाली डाक्टरको दर्ता खारेज गरेको छ ।

काउन्सिलले सूचना जारी गर्दै नेपाली नागरिकता त्यागेर विभिन्न देशका पासपोर्ट लिएका चिकित्सकहरूको दर्ता स्वतः खारेज गरिएको जनाएको हो । सूचनाअनुसार उनीहरूले ब्रिटिश, क्यानेडियन, अमेरिकी, न्युजिल्याण्ड, जर्मन, अष्ट्रेलियन र भारतीय नागरिकता तथा राहदानी प्राप्त गरेका थिए ।

नेपालमा प्रचलित कानुनअनुसार नेपाली नागरिकता त्यागेपछि मेडिकल अभ्यासका लागि आवश्यक दर्ता कायम नरहने व्यवस्था अनुसार यो निर्णय गरिएको काउन्सिलले स्पष्ट पारेको छ । दर्ता खारेज हुने चिकित्सकहरूमा सुमिन्द्रा पुन, शैलेश कुमार जयसवाल, भूपेश खड्का, आरती रानाभाट, रमेश राज पहारी, सन्जोक घले, ऋषिराज बराल, प्रभु पाण्डे, तृप्ति महर्जन, सृजना श्रेष्ठ लगायत रहेका छन् ।

त्यसैगरी, सुनिता विष्ट, दीपा मल्ल, सौरव जीसी, जेनिशा श्रेष्ठ, प्रभास रेग्मी, दीपिका ज्ञवाली, हेमु चौरसिया, समीक्षा शर्मा र मनोरमा पाण्डेको पनि दर्ता खारेज गरिएको हो । काउन्सिलले यस्तो कदम चिकित्सा पेसाको कानुनी तथा नैतिक मापदण्ड कायम राख्न आवश्यक भएको जनाएको छ ।