विश्वविद्यालयका पदाधिकारी खुला प्रतिस्पर्धाबाट छनोट गर्ने तयारी

काठमाडौं । सरकारले विश्वविद्यालयका पदाधिकारीहरू खुला प्रतिस्पर्धाबाट छनोट गर्ने प्रक्रिया अघि बढाएको छ । पदाधिकारीहरू पदमुक्त भएपछि रिक्त रहेका विश्वविद्यालयहरूमा नियुक्ति गर्न सिफारिस समिति गठनको तयारी गरिएको शिक्षा, विज्ञान तथा प्रविधि मन्त्रालयले जनाएको छ ।

प्रधानमन्त्री एवं कुलपति बालेन्द्र शाह (बालेन)को निर्देशनमा शिक्षा मन्त्री सस्मित पोखरेलको अध्यक्षतामा तीन सदस्यीय सिफारिस समिति गठन गर्ने प्रक्रिया अघि बढाइएको छ । समितिमा राष्ट्रिय योजना आयोगको शिक्षा हेर्ने सदस्य र मन्त्रालयका सचिव सदस्य रहने व्यवस्था गरिएको छ ।

Advertisement

मन्त्रालयका अधिकारीका अनुसार लामो समयदेखि विश्वविद्यालय पदाधिकारीविहीन हुँदा शैक्षिक तथा प्रशासनिक कार्य प्रभावित भएको भन्दै तत्काल नियुक्ति प्रक्रिया अघि बढाउन लागिएको हो । समिति गठन सम्बन्धी पत्र बुधबारसम्म तयार हुने बताइएको छ ।

समितिले खुला आह्वानमार्फत योग्य उम्मेदवारहरूबाट आवेदन लिई उपकुलपति तथा अन्य पदाधिकारी छनोट गर्नेछ । प्रतिस्पर्धात्मक मूल्यांकनका आधारमा छनोट प्रक्रिया अघि बढाइने सरकारको योजना छ ।

त्रिभुवन विश्वविद्यालय, काठमाडौं विश्वविद्यालय, पोखरा विश्वविद्यालय, पूर्वाञ्चल विश्वविद्यालय, लुम्बिनी बौद्ध विश्वविद्यालय, मध्यपश्चिम विश्वविद्यालय, सुदूरपश्चिम विश्वविद्यालय, कृषि तथा वन विज्ञान विश्वविद्यालय, नेपाल संस्कृत विश्वविद्यालय र राजर्षि जनक विश्वविद्यालयसहित विभिन्न संस्थामा पदाधिकारी नियुक्त गर्नुपर्ने अवस्था छ । सम्बन्धित विश्वविद्यालयका ऐनअनुसार सिफारिस समिति गठन गरी पारदर्शी र प्रतिस्पर्धात्मक प्रणालीमार्फत नियुक्ति गर्ने तयारी गरिएको मन्त्रालयले स्पष्ट पारेको छ ।

सरकारले लामो समयदेखि रोकिएको विश्वविद्यालय नेतृत्व चयन प्रक्रियालाई पारदर्शी र प्रतिस्पर्धात्मक बनाउने उद्देश्य राखेको छ । यसले उच्च शिक्षामा सुधार, प्रशासनिक स्थायित्व र शैक्षिक गुणस्तर वृद्धि हुने अपेक्षा गरिएको छ । साथै, योग्य उम्मेदवारहरूलाई खुला प्रतिस्पर्धामार्फत अवसर उपलब्ध हुने भएकाले प्रणालीगत सुधारको सुरुवात हुने सरकारको विश्वास छ ।

नियुक्ति प्रक्रिया छिट्टै सुरु हुने र समिति गठनपछि आवेदन आह्वान सार्वजनिक गरिने मन्त्रालयले जनाएको छ । यस प्रक्रियालाई शिक्षा क्षेत्रमा महत्वपूर्ण सुधारको कदमका रूपमा हेरिएको छ ।