किराँती अब हर्क साम्पाङको श्रम संस्कृति पार्टीमा वरिष्ठ नेता

विराटनगर । पूर्वमाओवादी नेता तथा पूर्वपर्यटनमन्त्री सुदन किराँती हर्क साम्पाङ नेतृत्वको श्रम संस्कृति पार्टीमा वरिष्ठ नेताको जिम्मेवारीमा रहने भएका छन् ।

पार्टी स्रोतका अनुसार किराँतीलाई वरिष्ठ नेतासहित संगठनात्मक संरचनामा एक उपाध्यक्ष, एक सचिव र १५ जना केन्द्रीय सदस्यको जिम्मेवारी बाँडफाँट गर्ने सहमति भएको छ । यो सहमति बिहीबार राति ललितपुरमा किराती पक्ष र पार्टी नेतृत्वबीच भएको वार्ताबाट टुंगिएको हो ।

Advertisement

काठमाडौंको बागबजारस्थित हार्दिक होटलमा शुक्रबार अपराह्न ३ बजे आयोजना हुने कार्यक्रममार्फत दुई पक्षबीचको पार्टी एकताको औपचारिक घोषणा गरिने भएको छ । भोजपुरका किराँती माओवादी राजनीतिबाट उदाएका नेता हुन् । उनी प्रचण्ड नेतृत्वको सरकारमा पर्यटनमन्त्री समेत बनेका थिए ।

पछिल्लो समय माओवादीमा भएको राजनीतिक पुनर्संरचना र नेपाली कम्युनिस्ट पार्टी (नेकपा) गठन प्रक्रियापछि असन्तुष्ट बनेका उनी प्रगतिशील लोकतान्त्रिक पार्टी (प्रलोपा)मा आबद्ध भएका थिए । प्रलोपा जनार्दन शर्माको पहलमा गठन भएको थियो । जहाँ किराती पाँच सदस्यीय अध्यक्ष परिषदका सदस्य थिए ।

तर, फागुन २१ को निर्वाचनपछि उनले सो पार्टी पनि परित्याग गरे । अब उनी हर्क साम्पाङ नेतृत्वको नयाँ राजनीतिक संरचनामा औपचारिक रूपमा जोडिने भएका हुन् ।