कोशीमा एचआईभी नियन्त्रण चुनौतीपूर्ण

विराटनगर । कोशी प्रदेशमा एचआईभी संक्रमण नियन्त्रणका लागि परीक्षण, उपचार र जनचेतना कार्यक्रम विस्तार गरिए पनि जोखिम समूहमा संक्रमणको चुनौती अझै कायम रहेको सरोकारवालाहरुले बताएका छन् । उनीहरुका अनुसार प्रदेशमा एचआईभी नियन्त्रण चुनौतीपूर्ण बनिरहेको छ ।

स्वास्थ्य निर्देशनालय, स्वास्थ्य कार्यालय मोरङ र एचएफ नेपालको सहभागितामा विराटनगरमा शुक्रबार आयोजित पत्रकार अन्तरक्रिया कार्यक्रममा एचआईभीको वर्तमान अवस्था, रोकथाम तथा उपचार सेवाका बारेमा विस्तृत छलफल गरिएको हो । कार्यक्रममा स्वास्थ्य कार्यालय मोरङका जनस्वास्थ्य प्रमुख योगराज घिमिरेले नेपालमा दैनिक औसत दुई जनामा एचआईभी सङ्क्रमण देखिने गरेको जानकारी दिँदै लागुऔषध प्रयोगकर्तामा संक्रमणको जोखिम अझ बढी रहेको बताए ।

उनका अनुसार सरकारले लिएको लक्ष्य ‘पन्चानब्बे–पन्चानब्बे–पन्चानब्बे’ अनुसार संक्रमित व्यक्तिको पहिचान, उपचार र भाइरल लोड नियन्त्रणमा ल्याउने अभियान अघि बढाइएको छ । कोशी प्रदेशमा संक्रमित खोजी तथा परीक्षण अभियानलाई अझ व्यापक बनाइएको पनि उनले बताए ।

कार्यक्रममा प्रस्तुत तथ्यांकअनुसार नेपालभर हाल चौँतीस हजार तीन सय सतहत्तर जना एचआईभी संक्रमित रहेका छन् । कोशी प्रदेशका एघारसहित देशभर बयानब्बेवटा सेवा केन्द्रमार्फत परीक्षण, उपचार र परामर्श सेवा सञ्चालन भइरहेको जानकारी दिइएको छ ।

सन् २००८ देखि एचआईभी संक्रमित समुदायसँग निरन्तर काम गर्दै आएको संस्थाले जनाएको छ । कोशी अस्पताल र भद्रपुर अस्पतालसहित देशका उन्नाइस अस्पतालमार्फत परीक्षण, उपचार, परामर्श तथा जनचेतनामूलक कार्यक्रम सञ्चालन भइरहेको जनाइएको छ ।

कार्यक्रममा आमाबाट बच्चामा संक्रमण रोकथाम, एआरटी केन्द्र सुदृढीकरण, भाइरल लोड परीक्षण किटको नियमित आपूर्ति तथा अस्पतालबीच समन्वय अझ प्रभावकारी बनाउनुपर्ने आवश्यकता औँल्याइएको थियो । सरोकारवालाले एचआईभी नियन्त्रणका लागि सरकारी संयन्त्र मात्रै पर्याप्त नहुने भन्दै समुदायस्तरमा जनचेतना विस्तार, जोखिम समूहमा लक्षित कार्यक्रम र बहुपक्षीय सहकार्य अपरिहार्य रहेको धारणा राखेका छन् ।