हत्याका दोषी बेलबारीका कमलप्रसाद : २२ वर्षसम्म लुके, एकपटक उम्किए

विराटनगर । मोरङको बेलबारीमा दुई दशकभन्दा लामो समयदेखि फरार रहँदै आएका हत्याका दोषी अन्ततः प्रहरीको फन्दामा परेका छन् । बेलबारी नगरपालिका–६ का ५५ वर्षीय कमलप्रसाद दाहाल पक्राउ परेका हुन् ।

तर, यो पक्राउ सामान्य भने होइन । किनभने पक्राउ परेपछि पनि उनी प्रहरीलाई झुक्याएर एकपटक उम्किन सफल भइसकेका थिए । झुटो परिचय र कागजातको सहारामा कानुनी दायराबाट फुत्किएका उनी फेरि पुनः निगरानीमा आएपछि यसपटक भने कारागारसम्म पुगेका छन् । दुई दशक लामो दाहालको फरार यात्रा अन्ततः टुंगिएको छ ।

Advertisement

दाहाललाई इलाका प्रहरी कार्यालय बेलबारीबाट खटिएको टोलीले आफ्नै घरबाट पक्राउ गरेको हो । २२ वर्षभन्दा लामो समयदेखि फरार सूचीमा रहेका दाहाललाई पक्राउ गर्नु सामान्य सफलताको विषय मात्रै नभएर प्रहरीका लागि चुनौतीपूर्ण अनुसन्धानको परिणामका रूपमा हेरिएको छ।

घटनाको पृष्ठभूमि २०६० सालतिरको हो । काशीराम खवासले दिएको किटानी जाहेरीका आधारमा दाहालसहित पाँच जनाविरुद्ध कर्तव्य ज्यान मुद्दा दर्ता भएको थियो । अदालतले २०६१ साल जेठ १० गते दाहाललाई दोषी ठहर गर्दै पाँच वर्ष कैद सजाय सुनाएको थियो । तर, फैसला गरेर अदालतले दोषी ठहर गरे पनि उनी कानुनी प्रक्रियाबाट टाढिँदै फरार भएका थिए ।

त्यसयता दाहालको खोजी कागजमा मात्र सीमित रह्यो । प्रहरी अभिलेखमा फरार प्रतिवादीका रूपमा रहिरहे पनि वास्तविक रूपमा भने उनी आफ्नै घरमा सामान्य जीवन बिताइरहेका थिए भन्ने कुरा पछिल्लो अनुसन्धानले देखाएको छ । प्रहरी स्रोतका अनुसार उनले वर्षौँसम्म आफ्नो परिचय लुकाउँदै सामान्य नागरिकजस्तै जीवनयापन गर्दै आएका थिए ।

मोरङ प्रहरी प्रमुख एसपी कवित कटवालका अनुसार दाहाललाई पक्राउ गर्नु पछाडिको प्रक्रिया सजिलो थिएन । प्रारम्भिक चरणमा उनी पक्राउ परे पनि झुटो विवरण पेस गरेर तत्कालै छुट्न सफल भएका थिए । प्रहरीलाई बुझाइएको ठेगाना, बाबुको नाम र व्यक्तिगत विवरण नै फरक पाइएको थियो । यही आधारमा अनुसन्धानमा अन्योल सिर्जना भएको थियो । उनी त्यसबेला उन्मुक्ति पाएर बाहिरिएका थिए ।

२०८१ सालमा उनलाई पहिलो पटक प्रहरीले पक्राउ गरेको थियो । तर, त्यतिबेला दाहालले आफ्नो परिचय नै फरक देखाएर प्रहरीलाई भ्रमित गरेका थिए । आवश्यक प्रमाणको अभाव र विवरणमा देखिएको असमानताका कारण प्रहरी उनलाई रिहा गर्न बाध्य भएको स्रोत बताउँछ । त्यसपछि उनी फेरि आफ्नो पुरानै जीवनशैलीमा फर्किएर घरमै आनन्दले बस्दै आएका थिए ।

तर, प्रहरीले यसपटक भने उनको गतिविधि र विगतको मुद्दामाथि गहिरो अनुसन्धान गर्यो । लामो अनुसन्धान, सूचनाको संकलन र प्रमाणको पुनः विश्लेषणपछि अन्ततः प्रहरी उनको वास्तविक पहिचान पुष्टि गर्न सफल भयो । त्यसपछि इन्स्पेक्टर राजीव गिरी नेतृत्वको टोलीले उनलाई घरबाटै पक्राउ गरेको हो ।

एसपी कटवालका अनुसार यसपटक प्रहरीले कुनै कमजोरी नदोहोर्याउने गरी प्रमाण संकलन गरेको थियो । ‘यसअघि उनी झुटो विवरण पेस गरेर उम्किएका थिए । तर, यसपटक सबै पक्षबाट पुष्टि भएपछि मात्र पक्राउ गरिएको हो,’ उनले भने । कटवालका अनुसार यो पक्राउले अपराध गरेर लुकेर बस्नेहरूलाई कानुनले अन्ततः नछाड्ने सन्देश दिएको छ ।

प्रहरीले पक्राउ गरेर दाहाललाई वैशाख २५ गते अदालतमा पेस गरेको थियो । जिल्ला अदालत मोरङका सूचना अधिकारी हेमबहादुर बुढाथोकीका अनुसार प्रहरीले बुझाएपछि दाहाललाई कैद सजाय भुक्तानका लागि कारागार चलान गरिएको छ । अदालतको फैसलाअनुसार अब दाहालले कैद सजाय भुक्तानका लागि २०८८ साल वैशाख २३ गतेसम्म कारागारमा बस्नुपर्ने छ ।

दाहालले अदालतमा पनि आफू उक्त हत्यामा संलग्न नभएको दाबी गरेका थिए । तर, पहिले नै भएको फैसलाले उनलाई दोषी ठहर गरिसकेको हुँदा उनका दाबीले कानुनी प्रक्रियामा कुनै असर पार्न नसकेको सूचना अधिकारी बुढाथोकीले बताए ।

प्रहरीका अनुसार यस मुद्दामा अझै अन्य चार जना प्रतिवादी फरार छन् । उनीहरूको खोजी जारी छ । लामो समयपछि ५ जनामध्ये एक जना मात्रै दोषी पक्राउ परेका छन् ।

दाहालको पक्राउले मोरङमा पुरानो हत्याकाण्ड फेरि चर्चामा आएको छ । दुई दशकभन्दा लामो समयसम्म कानुनी दायराबाट बाहिर रहन सफल भए पनि अन्ततः उनी कारागारसम्म पुग्नुले अपराध लुकाएर बस्ने प्रयास दीर्घकालीन रूपमा सफल नहुने कुरा पुष्टि भएको छ ।

‘कागज र पहिचान बदलेर अपराधबाट उम्किने प्रयास जतिसुकै लामो समयसम्म सफल देखिए पनि अन्ततः कानुनको दायरामा आउनै पर्छ,’ एसपी कटवालले भने ।