प्रधानमन्त्री अनुपस्थित भएपछि संसदमा राजीनामाको माग, विपक्षीको तीव्र विरोध

काठमाडौं । प्रतिनिधिसभा बैंठकमा सरकारको नीति तथा कार्यक्रममाथिको छलफलका क्रममा प्रधानमन्त्री बालेन्द्र शाह (बालेन) अनुपस्थित भएपछि संसदभित्र चर्को विवाद उत्पन्न भएको छ ।

प्रधानमन्त्रीको अनुपस्थितिलाई लिएर विपक्षी दलका सांसदहरूले कडा आपत्ति जनाउँदै उनको राजीनामा माग गरेका छन् । बुधबारको बैठकमा प्रधानमन्त्रीको तर्फबाट अर्थमन्त्री स्वर्णिम वाग्लेले नीति तथा कार्यक्रममाथि छलफल अघि बढाउने प्रस्ताव गरेका थिए ।

Advertisement

तर, प्रधानमन्त्री स्वयं उपस्थित नभएको भन्दै विपक्षी सांसदहरूले उक्त प्रक्रिया अस्वीकार गर्दै सदनमै विरोध जनाए । विरोधको अगुवाइ गरेका श्रम संस्कृत पार्टीका अध्यक्षसमेत रहेका प्रतिनिधिसभा सदस्य हर्क साम्पाङले प्रधानमन्त्रीको अनुपस्थितिलाई गम्भीर लापरबाहीको संज्ञा दिँदै तत्काल राजीनामा दिनुपर्ने माग गरेका थिए ।

उनीसँगै अन्य विपक्षी सांसदहरूले पनि प्रधानमन्त्रीको अनुपस्थितिले सरकारको जवाफदेहितामाथि प्रश्न उठेको बताएका थिए । विपक्षी सांसदहरूले प्रधानमन्त्री उपस्थित हुनुपर्ने संवैधानिक अभ्यास र परम्परालाई बेवास्ता गरिएको आरोप लगाउँदै संसदमा नाराबाजीसमेत गरेका छन् । उनीहरूले अर्थमन्त्रीमार्फत प्रस्तुत गरिएको छलफल प्रक्रियालाई अस्वीकार गर्दै प्रधानमन्त्रीको प्रत्यक्ष जवाफको माग गरेका हुन् ।

सभामुख डोलप्रसाद अर्याल (डीपी)ले बैठक सञ्चालन गर्न खोजे पनि विपक्षीको लगातारको अवरोधका कारण सदन केहीबेर अवरुद्ध बनेको थियो । यसैबीच, सत्ता पक्षका सांसदहरूले भने सरकारको तर्फबाट अर्थमन्त्रीमार्फत नीति तथा कार्यक्रममाथि छलफल अघि बढाउनु संसदीय अभ्यासभित्रै पर्ने तर्क गरेका छन् । उनीहरूले विपक्षीको विरोधलाई राजनीतिक प्रदर्शनको रूपमा व्याख्या गरेका छन् ।

संसदभित्रको यो घटनाले आगामी आर्थिक वर्षको नीति तथा कार्यक्रममाथिको छलफललाई थप तनावपूर्ण बनाएको छ । विपक्षी र सत्तापक्षबीचको तिक्ततापूर्ण बहसका कारण सदनको वातावरण केही समय अस्थिर बनेको थियो ।