मुक्कुम्लुङमा केबलकार निर्माण रोक्न माग गर्दै प्रदर्शन

काठमाडाैं । ताप्लेजुङको मुक्कुम्लुङ (पाथीभरा) क्षेत्रमा निर्माणाधीन केबलकार आयोजना खारेजीको माग गर्दै प्रदर्शन भएकाे छ । मुक्कुम्लुङ तान्सेप चुम्भो तथा मुक्कुम्लुङ संरक्षण अन्तरदलीय संघर्ष समितिले केबलकार निर्माण राेक्न माग गर्दै आन्दोलनका कार्यक्रम सार्वजनिक गरेको हाे ।

समितिले केबलकार निर्माणका नाममा गैरकानुनी रूपमा वन फडानी गरिएको, जग्गा किनबेचमा ठगी भएको, भ्रष्टाचार मौलाएको र झुटा तथा फर्जी कागजातका आधारमा ऐतिहासिक मुक्कुम्लुङ क्षेत्र अतिक्रमण गरिएको गम्भीर आरोप लगाएको छ ।

Advertisement

सरकारसँग पटक–पटक वार्ता र संवाद भइरहेको र सरकारले निर्माण कार्य रोक्न निर्देशन दिँदा समेत त्यसलाई बेवास्ता गर्दै काम सुचारु राखिएको भन्दै समितिले बाध्य भएर आन्दोलनमा उत्रनु परेको जनाएको छ ।

संघर्ष समितिले वैशाख अन्तिमदेखि जेठ मध्यसम्मका लागि आन्दोलन गर्ने बताएकाे छ । संघर्ष समितिले केबलकार निर्माणसँग सम्बन्धित सम्पूर्ण गतिविधि तत्काल बन्द गर्न माग गरेकाे छ ।