प्रेस युनियनको संगठन सुदृढीकरण र व्यावसायिक विकासका ७ बुँदे निर्णय

भोजपुर । नेपाल प्रेस युनियन कोशी प्रदेश समितिको पूर्ण बैठक भोजपुरमा सम्पन्न भएको छ । प्रदेश अध्यक्ष मीनकुमार नवोदितको अध्यक्षतामा बसेको उक्त बैठकले संगठन सुदृढीकरण, विधान संशोधन, सदस्यता विस्तार र पत्रकारिताको व्यावसायिक विकास लगायतका विषयमा सात वटा महत्त्वपूर्ण निर्णयहरू गरेको हो ।

बैठकले आगामी जेठ १३ गते काठमाडौंमा हुने नेपाल प्रेस युनियनको राष्ट्रिय विधान सभालाई मध्यनजर गर्दै विधान संशोधनका लागि सुझाव समिति गठन गरेको छ । प्रदेश महासचिव सञ्जीव वाग्लेको संयोजकत्वमा गठित उक्त समितिले प्रदेशका १४ वटै जिल्ला शाखाबाट सुझावहरू संकलन गरी केन्द्रीय समितिमा प्रतिवेदन बुझाउने जिम्मेवारी पाएको छ ।

Advertisement

संगठनलाई थप चलायमान बनाउन कोशी प्रदेशका सबै जिल्लामा सदस्यता विस्तार अभियान सञ्चालन गरिने भएको छ । ‘प्रेस स्वतन्त्रता, श्रम अधिकार र पत्रकारको पेसागत सुरक्षाका लागि सक्रिय पत्रकारहरूलाई गोलबद्ध गर्दै साझा आवाज बलियो बनाउने हाम्रो लक्ष्य हो,’ अध्यक्ष नवोदितले भने ।

बैठकले युनियनको स्थापना दिवसलाई प्रदेशभरि भव्य रूपमा मनाउन सबै जिल्ला शाखाहरूलाई आह्वान गरेको छ । साथै, आगामी दिनमा झापामा सल्लाहकार तथा परामर्श समितिसहितको विस्तारित भेला आयोजना गर्ने र शाखाहरूबिचको समन्वयलाई थप मजबुत बनाउने निर्णय समेत गरिएको छ ।

बैठकमा सहभागी पदाधिकारीहरूले पत्रकारिता क्षेत्रमा बढ्दो चुनौती, डिजिटल मिडियाको प्रभाव र श्रमजीवी पत्रकारहरूको अवस्थाका बारेमा गम्भीर छलफल गरेका थिए । सञ्चार माध्यमको बदलिँदो स्वरूपसँगै पत्रकार संगठनहरूले पनि आफूलाई समयानुकूल परिमार्जन गर्दै लैजानुपर्ने निष्कर्ष बैठकले निकालेको छ ।

भोजपुरमा आयोजित बैठकले स्थानीय पर्यटन र सांस्कृतिक सम्पदाको प्रचारप्रसारमा पत्रकारिता क्षेत्रले खेल्नुपर्ने भूमिकाका बारेमा पनि विशेष निर्णय गरेको छ । स्थानीय तह र पर्यटन व्यवसायीसँगको सहकार्यमा भोजपुरलाई पूर्वी नेपालकै प्रमुख पर्यटकीय गन्तव्य बनाउन सञ्चारकर्मीहरूले प्रभावकारी भूमिका खेल्नुपर्नेमा जोड दिइएको छ ।

प्रेस युनियन कोशी प्रदेशले संगठनलाई विकेन्द्रीकृत गर्ने उद्देश्यले प्रदेशका विभिन्न स्थानमा पुगेर बैठक गर्ने संस्कारको विकास गरेको छ । यसअघि विराटनगर, धनकुटा, भेडेटार, गाईघाट र बेलका जस्ता स्थानमा बैठक सम्पन्न भइसकेका छन् । प्रदेश नेतृत्व जिल्लामै पुग्दा स्थानीय पत्रकारका समस्या पहिचान गर्न र समन्वय बढाउन सहज भएको महासचिव सञ्जीव वाग्लेले बताए ।