कोशीका मुख्यमन्त्रीको गुनासो, ‘हाम्रा हातखुट्टा बाँधिदैछन्’

विराटनगर । कोशी प्रदेशका मुख्यमन्त्री हिक्मतकुमार कार्कीले संघीय सरकारले प्रदेशको क्षेत्राधीकारमाथि प्रहार गरिरहेको बताएका छन् ।

प्रदेशको बजेट निर्माणका लागि सांसदसँग सुझाव संकलन गर्न मंगलबार बिहान आयोजित कार्यक्रममा उनले प्रदेशको क्षेत्राधिकारमाथि केन्द्रले हस्तक्षेप गरेको बताएका हुन् । संघीय सरकारले केही दिनअघि नयाँ सवारी दर्ता नगर्न परिपत्र गरेको थियो । प्रदेशको क्षेत्राधिकार रहेको सवारीदर्तामा संघीय सरकारले एक्कासी हस्तक्षेप गरी दर्ता रोकेको उनले बताए ।

Advertisement

‘यातायात प्रदेशको क्षेत्रधिकारमा पर्छ । संघीय सरकारले नयाँ दर्ता बन्द गर्यो । सल्लाह बिना, यसले प्रदेशको आम्दानीमा प्रभाव पार्छ,’ उनले भने, ‘हाम्रा हातखुट्टा बाँधिदैछन् ।’ संविधानले नै दिएको अधिकार संघीय सरकारको परिपत्रका कारण प्रभावित भएको उनले बताए ।

संघीय सरकारले प्रदेशका क्षेत्रधिकारका अन्य विषयमा पनि हस्तक्षेप गरिरहेको छ । मन्त्री र सचिवस्तरीय निर्णय भन्दै प्रदेश कानुन र संविधानको भावनाविपरीत परिपत्र आइरहेका छन् । जसले गर्दा प्रदेश सरकार दबाबमा छ ।

संघीय सरकारले पठाएको परिपत्र कर्मचारीले सहजै मान्ने तर प्रदेशको कानुन कार्यान्वयनमा अटेरी गर्ने पारिपाटी देखिएको गुनासो मुख्यमन्त्रीले निकटस्थहरुसँग गरिरहेका छन् ।