विश्व वातावरण दिवस: विराटनगरमा दुई संस्था सम्मानित 

विराटनगर । विश्व वातावरण दिवसको अवसरमा विराटनगर महानगरपालिकाले वातावरण संरक्षण र हरियाली विस्तारमा उल्लेख्य योगदान पुर्‍याउने दुई संस्थालाई सम्मान गरेको छ । महानगर परिसरमा आयोजित कार्यक्रममा ‘गो ग्रिन विराटनगर’ र ‘सुनौलो अवसर युवा क्लब’ लाई सम्मान गरिएको हो ।

Advertisement

महानगरपालिकाका मेयर नागेश कोइरालाले गो ग्रिन विराटनगरका नवीनचन्द्र अधिकारी र सुनौलो अवसर युवा क्लबका पुष्पराज गिरीलाई सम्मानपत्र प्रदान गर्दै उनीहरूको योगदानको उच्च प्रशंसा गरे ।

कार्यक्रमलाई सम्बोधन गर्दै मेयर कोइरालाले वातावरणीय संकट विश्वकै साझा चुनौती बनेको बताए । उनले जलवायु परिवर्तनका असर न्यूनीकरणका लागि सरकार, निजी क्षेत्र र नागरिक समाजको संयुक्त प्रयास आवश्यक रहेकोमा जोड दिए । ‘पछिल्ला वर्षहरूमा बढ्दो तापक्रम र अनियमित वर्षाले वातावरणीय जोखिम बढाएको छ,’ मेयर कोइरालाले भने, ‘हरित वातावरणबिना दिगो विकास सम्भव छैन । आज रोपिएको एउटा बिरुवाले भोलिको पुस्तालाई सुरक्षित भविष्य दिने छ । प्रत्येक घर, विद्यालय र उद्योगलाई वृक्षारोपण अभियानमा जोडिन आग्रह गर्छु ।’

महानगरका वातावरण शाखा प्रमुख इन्जिनियर राकेश ठाकुरले महानगरले सञ्चालन गरिरहेका सचेतनामूलक कार्यक्रम र हरियाली प्रवर्द्धनका प्रयासहरूबारे जानकारी दिए ।

यसअघि वातावरण संरक्षणको सन्देशसहित महेन्द्र चोकबाट र्‍याली निकालिएको थियो । जसमा विभिन्न संघसंस्था, युवा समूह र विद्यार्थीहरूको सहभागिता थियो । कार्यक्रममा विद्यार्थीहरूले वातावरण संरक्षणसम्बन्धी सन्देशमूलक नाटक तथा गीत प्रस्तुत गरेका थिए ।

विराटनगर महानगरपालिकाले आगामी दिनमा प्रदूषण नियन्त्रण, जैविक विविधता संरक्षण र दिगो सहरी विकासलाई प्राथमिकताका साथ अघि बढाउने प्रतिबद्धता जनाएको छ ।