झापामा युवतीलाई पोलमा बाँधेर दलियो कालोमोसो, चार जना पक्राउ

विराटनगर । झापाको बिर्तामोडमा एक युवतीलाई सार्वजनिक रूपमा दुर्व्यवहार गरेको आरोपमा प्रहरीले चार जनालाई पक्राउ गरेको छ ।

बिर्तामोड नगरपालिका–२ स्थित चारपाने चोकमा २१ वर्षीया सबिना राजवंशीलाई बिजुलीको पोलमा बाँधेर कालोमोसो दलेको आरोपमा प्रहरीले चार जनालाई पक्राउ गरेको हो ।

Advertisement

इलाका प्रहरी कार्यालय अनारमनीका अनुसार शुक्रबार साँझ करिब ६ः३० बजे पुरानो रिसिइबीका कारण केही व्यक्तिहरूको समूहले राजवंशीलाई बिजुलीको पोलमा हात बाँधेर कालोमोसो दलेका थिए ।

कालोमोसो दलेको भिडियो सार्वजनिक भएपछि प्रहरीले कन्काई नगरपालिका– ८ का १८ वर्षीय समिर मुर्मु, २० वर्षीया सबिना मुर्मु, २५ वर्षीया स्वस्तिका मुर्मु र १९ वर्षीया पुजा बस्नेतलाई पक्राउ गरेको हो ।

पक्राउ परेकाहरूमाथि इलाका प्रहरी कार्यालय अनारमनीले अनुसन्धान गरिरहेको छ ।