सातै प्रदेशले सार्वजनिक गर्दैछन् नयाँ बजेट

काठमाडौं । देशका सातै प्रदेश सरकारले आज (सोमबार) आगामी आर्थिक वर्ष २०८३–८४ का लागि नयाँ बजेट सार्वजनिक गर्दैछन् ।

संविधान तथा प्रचलित कानुनी व्यवस्थाअनुसार प्रत्येक प्रदेश सरकारले असार १ गते आगामी आर्थिक वर्षको आय–व्ययको विवरण प्रदेशसभामा प्रस्तुत गर्नुपर्ने हुन्छ । सोही व्यवस्थाअनुसार कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका आर्थिक मामिला तथा योजना मन्त्रालयहरूले नयाँ बजेट सार्वजनिक गर्न लागेका हुन् ।

Advertisement

प्रदेश सरकारहरूले आगामी वर्षका नीति तथा कार्यक्रमलाई कार्यान्वयन गर्ने आधारका रूपमा बजेट प्रस्तुत गर्नेछन् । प्रदेश सरकारहरूले यसपटक शिक्षा, स्वास्थ्य, कृषि, रोजगारी सिर्जना, सुशासन प्रवर्धन, पर्यटन विकास तथा भौतिक पूर्वाधार निर्माणलाई मुख्य प्राथमिकतामा राखेर बजेट तयार पारेका छन् ।

स्थानीय उत्पादनको प्रवर्धन, युवालाई लक्षित रोजगार कार्यक्रम, कृषि आधुनिकीकरण तथा सेवा प्रवाह सुधारका विषय पनि बजेटमा समेटिने छ । संघीय सरकारको बजेट सार्वजनिक भएपछि प्रदेशहरूले आफ्ना स्रोत, आवश्यकता र प्राथमिकताअनुसार बजेट निर्माण गरेका छन् ।

संघीय सरकारले भने गत जेठ १५ गते आगामी आर्थिक वर्ष २०८३–८४ का लागि बजेट सार्वजनिक गरिसकेको छ । सोमबार सार्वजनिक हुने प्रदेशका बजेटहरूले आगामी वर्ष प्रदेशस्तरीय विकास योजना, सामाजिक क्षेत्रका कार्यक्रम तथा आर्थिक गतिविधिको दिशा निर्धारण गर्ने छ ।