विराटनगरको परोपकार घाटमा रहस्यमय दृश्य, मध्यरातमा निर्वस्त्र युवाहरुको अश्लील हर्कत ! (भिडियाेसहित)

विराटनगर । विराटनगर महानगरपालिका–१ स्थित परोपकार घाटमा सोमबार मध्यराति एउटा अनौठो र रहस्यमय दृश्य देखियो । घटना राति करिब १२ः३० बजेतिरको हो ।

घटनासँग सम्बन्धित भिडियो हेर्दा घाटमा शव जलाउनलाई चिता बनाउने ठाउँमा आगो बालेर ६ जना युवाहरु बसिरहेको देखिन्छ । त्यहाँ रहेकामध्ये २ जना युवा उभिएर एकअर्कालाई धकेलाधकेल गर्दै वादविवाद गरिरहेका थिए । तीमध्ये १ जना युवा पूरै नांगो अवस्थामा छन् भने अर्का युवाले कम्मरमुनिको भित्री वस्त्र मात्रै लगाएका छन् । उनीहरुले अश्लील शब्दहरु बोलेको पनि सुन्न सकिन्छ ।

Advertisement

निर्वस्त्र रहेका युवाले भुइँबाट खरानीजस्तो वस्तु उठाएर भित्री वस्त्र लगाएका युवाको शरीरमा बारम्बार दलिदिएजस्तो देखिन्छ । ती २ जनाबीच केहीबेर वादविवाद र धकेलाधकेल चलिरहेको भिडियोमा देख्न सकिन्छ । उनीहरुले टाउकोमा कालो कपडाको फेटा बाँधेका छन् ।

नांगै रहेर विभिन्न हर्कतहरु गरिरहेको दृश्य त्यहाँ रहेका अरु ४ जनाले हेरिरहेका थिए । तर, बसिरहेका उनीहरुले कुनै प्रतिक्रिया जनाउँदैनन् । बसेकामध्ये १ जना युवाले भित्री वस्त्र लगाएका छन् । अरु ३ जनाले पूरै कपडा लगाएका छन् । कपडा लगाएकामध्ये १ जना कालो कपडा लगाएर उभिएका छन् ।

आगो बालिएको स्थान अर्थात् चिता बनाउने ठाउँको वरपर माटोको घैला, पानीका बोतलहरु, दाउरा लगायत देखिन्छ सकिन्छ । चिता बनाउने ठाउँमा भने दाउराको आगो दनदनी बलिरहेको छ । बलिरहेको आगोमाथि पनि माटोको भाँडो राखेजस्तो देखिन्छ । अत्यधिक गर्मीका बेला ती युवाहरु आगो वरपर बसेका छन् ।

शव जलाउने घाटमा मध्यराति भेटिएका युवाहरुले नांगै रहेर कस्तो हर्कत गरेका हुन् भन्ने यकिन छैन । स्थानीयले भने मदिरा सेवन गरेका युवाहरुले घाटमा आएर होहल्ला गर्दै शरीरका कपडा पूरै खोलेर अश्लील हर्कत गरेको बताए । त्यस घटनासँग सम्बन्धित भिडियो पनि स्थानीयले नै खिचेका हुन् ।

घटनाका प्रत्यक्षदर्शी स्थानीय समीर भुजेलले होहल्ला सुनेपछि घाटमा पुगेर हेर्दा यस्तो दृश्य देखिएको बताए । ‘घाटको चिता बनाउने ठाउँमा दाउराको आगो बालेर ६ जना युवा बसिरहेका थिए । तीमध्ये केही नांगै थिए । केहीले मात्रै कपडा लगाएको पायौं । उनीहरुले मदिरा वा अरु कुनै वस्तुको नसामा लट्ठ भएर अश्लील हर्कत गरेजस्तो देखिन्थ्यो,’ भुजेलले भने ।

उनका अुनसार होहल्ला सुनेपछि छरछिमेकी युवाहरु भेला भएर घाटमा पुग्दा लज्जानक दृश्य देखिएको थियो । ‘हामी छरछिमेकी ८–९ जना युवाहरु घाटमा पुग्यौं । परबाट हेर्दा त शव (लास) जलाएजस्तो देखिन्थ्यो । तर, नजिक पुग्दा मात्रै त्यहाँ रहेका र नांगै बसेका युवाहरुले अश्लील हर्कत गरिरहेको पायौं । त्यसपछि हामीले मोबाइलबाटै भिडियो बनाउन थाल्यौं । सोधीखोजी गर्दा पनि उनीहरुले कुनै जवाफ दिएनन्,’ भुजेल भन्छन् ।

उनका अनुसार सोधीखोजी गर्दा ती युवाहरुले उल्टै अश्लील शब्द प्रयोग गरेर गालीगलौज गरेको उनले बताए । ‘उनीहरुले गालीगलौज गरे पनि हामी जाइलागेनौं । बरु हाम्रो गाउँठाउँमा यस्तो गलत हर्कत हुनु ठीक हैन भन्ने लाग्यो । गलत गतिविधि रोक्नुपर्छ भनेर प्रहरीलाई पनि खबर गर्यौं । तर, प्रहरी आएनन्,’ उनले भने । भुजेलले मुर्दा जलाउने घाटमा मध्यराति केही युवाहरू नांगै अवस्थामा अश्लील हर्कत गरेर बसेको दृश्यले सबैलाई झस्काएको बताए ।

घटनाका प्रत्यक्षदर्शीसमेत रहेका अर्का स्थानीय रोहित मण्डलले नांगो अवस्थामा आगो बालेर लास जलाउने घाटमा बसेको दृश्यले सबैलाई आश्चर्यचकित पारेको बताए । ‘यो कुनै साधना, ध्यान र तपस्या गरेको हो जस्तो लाग्दैन । किनभने ६ जनाको समूहमा रहेकामध्ये केहीले मात्रै पूरै कपडा लगाएका थिए । निर्वस्त्र हुनेले गरेको हर्कत अपाच्य थियो । तर, पहिलोपटक देखिएको अनौठो दृश्यले स्थानीयस्तरमा विभिन्न खाले जिज्ञासा र चासो उत्पन्न गराएको छ,’ उनले भने ।

उनका अनुसार दाहसंस्कारका लागि प्रयोग हुने चिता बनाउने स्थाननजिकै आगो बालेर त्यसको वरिपरि केही युवाहरू निर्वस्त्र वा अर्धनग्न अवस्थामा उभिएको, बसिरहेको तथा आपसमा कुराकानी र अश्लील शब्द बोल्दै विववाद गरिरहेको जस्तो देखिन्छ । तर, उनीहरू को हुन्, त्यहाँ किन पुगेका थिए र कुन उद्देश्यले त्यसरी बसेका थिए भन्ने विषय भने थाहा हुन नसकेको मण्डलले बताए ।

दृश्यमा रहेका व्यक्तिहरूले कुनै धार्मिक अनुष्ठान, परम्परागत कर्मकाण्ड वा अन्य गतिविधि गरिरहेका हुन् कि भन्ने विषयमा समेत स्पष्ट छैन । सोधीखोजी गर्दा पनि ती युवाहरुले उल्टै दुर्व्यवहार गरेको र स्पष्ट जवाफ नदिएको मण्डलको भनाइ छ । हेर्दा ती युवाहरु मदिरा वा अन्य कुनै वस्तुको नसामा लट्ठ भएर अश्लील हर्कत गरिरहेजस्तो देखिने उनले बताए ।

परोपकार घाट विराटनगरको प्रमुख दाहसंस्कार स्थल हो । सामान्यतया रातिको समयमा त्यहाँ अन्तिम संस्कारबाहेक अन्य गतिविधि कम हुने गरेको स्थानीय बताउँछन् । तर, पछिल्लो घटनाले घाटमा रातको समयमा हुने गतिविधिका बारेमा नयाँ प्रश्नहरू उठाएको छ ।

स्थानीयले सार्वजनिक स्थल तथा दाहसंस्कार स्थलको मर्यादा कायम राख्न सम्बन्धित निकायले निगरानी बढाउनुपर्ने आवश्यकता औँल्याएका छन् । उनीहरूले घाटमा रातको समयमा हुने गतिविधिमाथि ध्यान दिनुपर्ने र आवश्यक परे सुरक्षा व्यवस्थासमेत कडा बनाउनुपर्ने बताए ।

भिडियोमा देखिएका कोही पनि व्यक्तिहरूको पहिचान खुल्न सकेको छैन । उनीहरूले कुनै आपराधिक वा गैरकानुनी गतिविधि गरेको भन्ने कुरा पनि भिडियोका आधारमा मात्र पुष्टि गर्न सकिने अवस्था छैन ।

केही स्थानीयले भने मसानघाटमा अघोरी उतारेको वा मसान खेलाएको हुनसक्ने अड्कल गरेका छन् । तर, त्यसको स्वतन्त्र पुष्टि हुन सकेको छैन । ‘मसानघाटमा मध्यराति अघोरी (कालो जादु गर्न जानेको व्यक्ति) उतारिन्छ भन्ने सुनेका थियौं । राति मसान पनि खेलाउँछन् भन्ने चर्चा हुन्थ्यो । सुरुमा हेर्दा त त्यही हो कि जस्तो पनि लाग्यो । तर, मातेको अवस्थामा र नांगै रहेका युवाहरुको अश्लील हर्कतले हामी सबैलाई आश्चर्यमा पार्यो,’ स्थानीय भरत कट्टेलले भने, ‘आजसम्म नदेखेको अनौठो दृश्य देखियो । सम्बन्धित निकायले घटनाका बारेमा चासो दिएर वास्तविकता सार्वजनिक गर्नुपर्छ । यस्तो गतिविधिको उद्देश्य र त्यसमा संलग्न व्यक्तिहरूका बारेमा स्पष्ट पार्नुपर्छ ।’

मोरङ प्रहरीका सूचना अधिकारी डीएसपी मकेन्द्रकुमार मिश्रले नयाँ खालको घटना थाहा भएको बताए । ‘नयाँ र अनौठो घटनाको भिडियो प्राप्त भएको छ । प्रहरीले अनुसन्धान अघि बढाएको छ,’ उनले भने । डीएसपी मिश्रले घटनाको अनुसन्धान अघि बढाएर ती युवाहरुको पहिचान गर्न प्रहरीको विशेष टोली नै परिचालन गरिएको जानकारी दिए । युवाहरुको पहिचान गरेर अनुसन्धान पूरा भएपछि घटनाको वास्तविकता पत्ता लाग्ने उनले बताए ।

विराटनगर महानगरपालिका–१ का वडाध्यक्ष काजीबहादुर बस्नेतले परोपकार घाटमा रातको समयमा केही समयदेखि गलत हर्कत हुने गरेको जानकारीमा आएको बताए । ‘परोपकार घाटमा केही समयदेखि गलत गतिविधि भइरहेको जानकारीमा आएको छ । त्यस्ता गतिविधिमा संलग्नले अपराध पनि गर्न सक्छन् । घाटमा गलत गतिविधिले निरन्तरता पाएको थाहा हुनसाथ यसअघि नै प्रहरीलाई जानकारी गराइसकिएको छ । घाटको सुरक्षा व्यवस्था कडा बनाउनुपर्ने देखिन्छ,’ बस्नेतले भने ।

भिडियाे