रंगेलीको बजेट ८१ करोड बढी

रंगेली । मोरङको रंगेली नगरपालिकाले आगामी आर्थिक वर्ष २०८३–०८४ का लागि ८१ करोड रूपैयाँभन्दा बढीको बजेट ल्याएको छ । रंगेलीले ८१ करोड ३३ लाख ४८ हजार रुपैयाँको बजेट सार्वजनिक गरेको हो ।

१४औँ नगरसभामार्फत सार्वजनिक गरिएको बजेटले शिक्षा, स्वास्थ्य र पूर्वाधार क्षेत्रलाई प्राथमिकतामा राखेको छ । कार्यवाहक नगर प्रमुख तथा नगरसभा अध्यक्ष भूमा पराजुलीले वडा नम्बर ९ का वडाध्यक्ष चूडामणि रेग्मीलाई नीति, कार्यक्रम र बजेट प्रस्तुत गर्न अनुमति दिएकी थिइन् ।

Advertisement

निवर्तमान नगर प्रमुख दिलीप बगडियाको विशेष आतिथ्यतामा सम्पन्न नगरसभामा वडाध्यक्ष रेग्मीले आगामी आर्थिक वर्षको आय–व्यय विवरण प्रस्तुत गरेका थिए । प्रस्तुत बजेटअनुसार कुल विनियोजित रकममध्ये ६७ प्रतिशत चालुतर्फ र ३३ प्रतिशत पुँजीगततर्फ विनियोजन गरिएको छ ।

नगरपालिकाका प्रमुख प्रशासकीय अधिकृत प्रदीप साहले बहुवर्षीय योजनालाई निरन्तरता दिँदै पूर्वाधार विकास, स्वास्थ्य सेवा र शिक्षालाई बजेटमा विशेष प्राथमिकतामा राखिएको बताए । नगरसभाको अवसरमा सेवा निवृत्त शिक्षक–शिक्षिकालाई सम्मान समेत गरिएको थियो ।

चालु आर्थिक वर्ष २०८२–०८३ का लागि रंगेली नगरपालिकाले ८३ करोड रुपैयाँको बजेट विनियोजन गरेको थियो । आगामी आर्थिक वर्षका लागि भने बजेट घटेर ८१ करोड ३३ लाख ४८ हजार रुपैयाँमा सीमित भएको छ ।