आर्थिक समृद्धि र रोजगारी सिर्जना सरकारको पहिलो प्राथमिकता हुनुपर्छ: वरिष्ठ उपाध्यक्ष  वैद्य

झापा । नेपाल उद्योग वाणिज्य महासंघका वरिष्ठ उपाध्यक्ष सुरकृष्ण वैद्यले सरकारले आर्थिक समृद्धिलाई केन्द्रमा राखेर काम गर्नुपर्ने बताएका छन् । मुलुकमा लामो समयपछि स्थायी सरकार बनेको उल्लेख गर्दै उनले स्थायित्वलाई समृद्धिसँग जोड्न सकिए मात्र जनअपेक्षा पूरा हुने धारणा राखे ।

बिर्तामोड उद्योग वाणिज्य संघको आठौँ वार्षिक साधारण सभालाई सम्बोधन गर्दै वैद्यले व्यवसायीलाई समेटेर अघि बढ्न सके सरकार सफल हुने बताए । आर्थिक गतिविधि विस्तार, लगानी प्रवर्द्धन र निजी क्षेत्रसँग सहकार्यलाई प्राथमिकतामा राख्नुपर्ने उनको भनाइ थियो ।

Advertisement

उनले सरकारको पहिलो दायित्व आर्थिक समृद्धि हासिल गर्नु, युवालाई  विदेश पलायन रोक्नु र स्वदेशमै रोजगारी सिर्जना गर्नु रहेको उल्लेख गरे । त्यसका लागि व्यवसायीलाई लगानीमैत्री वातावरण उपलब्ध गराउन आवश्यक रहेको उनको धारणा थियो ।

‘व्यवसायी स्वच्छ र पारदर्शी ढंगले काम गर्न चाहन्छन् । त्यसका लागि अनावश्यक झन्झट र अवरोध हटाइनुपर्छ,’ उनले भने । वैद्यले मुलुकको अर्थतन्त्रलाई चलायमान बनाउन विकास निर्माणमा पुँजीगत खर्च वृद्धि, सुशासनको प्रत्याभूति र निजी क्षेत्रप्रति विश्वासको वातावरण निर्माणमा सरकारले ध्यान दिनुपर्ने सुझाव दिए ।

संघका अध्यक्ष राजु न्यौपानेको अध्यक्षता तथा वैद्यको प्रमुख आतिथ्यमा सम्पन्न कार्यक्रममा महासंघका केन्द्रीय उपाध्यक्षहरू कृष्णप्रसाद शर्मा, दिल सुन्दर श्रेष्ठ, नरेशलाल श्रेष्ठ, प्रबलजङ्ग पाण्डे, केन्द्रीय सदस्य दीपक नेपाल, अर्जुनकुमार श्रेष्ठ र नवीन रिजाल लगायतको उपस्थिति थियो ।

कार्यक्रममा पूर्वअध्यक्ष तथा संविधानसभा सदस्य सुधीरकुमार सिवाकोटी, संघका पूर्वअध्यक्ष बलराम कार्की तथा झापाका सहायक प्रमुख जिल्ला अधिकारी अञ्जन न्यौपानेले शुभकामना मन्तव्य राखेका थिए ।

कार्यक्रममा अध्यक्ष न्यौपानेले उद्योगी व्यवसायीको हितमा संघ निरन्तर क्रियाशील रहेको बताए । उनको कार्यकालमा सम्पन्न गतिविधिसम्बन्धी श्रव्य दृश्य सामग्री समेत प्रस्तुत गरिएको थियो । सो अवसरमा व्यवसायी चान मोहम्मद र उमाकान्त ढुंगेल तथा पत्रकार इन्द्रसिंह राजवंशी र अच्युत सुवेदीलाई नगदसहित पुरस्कृत गरिएको थियो ।