ढल्केबर–हेटौँडा प्रसारण लाइन निर्माणको बाटो खुल्यो: मन्त्री विराजभक्त श्रेष्ठ

काठमाडौं । नेपालको ऊर्जा पूर्वाधारमा मेरुदण्ड मानिएको ढल्केबर–हेटौँडा ४०० केभी प्रसारण लाइन निर्माणमा रहेको लामो समयदेखिको अवरोध हटेको छ । ऊर्जा, जलस्रोत तथा सिँचाइ मन्त्री विराजभक्त श्रेष्ठले मन्त्रिपरिषद्को पछिल्लो निर्णयसँगै यस आयोजनाको निर्माण कार्य अघि बढाउने बाटो खुलेको जानकारी दिए ।

विभिन्न प्राविधिक तथा स्थानीय अवरोधका कारण करिब १२ वर्षदेखि अल्झिएको यो महत्त्वपूर्ण आयोजना अबको दुई महिनाभित्रै सम्पन्न हुने विश्वास मन्त्री श्रेष्ठले व्यक्त गरेका छन् । यसलाई नेपालको ऊर्जा क्षेत्रका लागि एक ‘ऐतिहासिक उपलब्धि’ का रूपमा व्याख्या गरिएको छ ।

मन्त्री श्रेष्ठका अनुसार यो प्रसारण लाइन सञ्चालनमा आएपछि नेपालको राष्ट्रिय प्रसारण प्रणाली थप सुदृढ, सन्तुलित र भरपर्दो हुनेछ । उनले भने, ‘यो केवल एउटा प्रसारण लाइन मात्र होइन, नेपालको ‘ऊर्जा राजमार्ग’ हो । यसले पूर्वमा उत्पादन भएको बिजुली पश्चिमसम्म र पश्चिमको बिजुली पूर्वसम्म सहजै प्रवाह गर्न सहयोग पुर्‍याउने छ ।’

यस आयोजनाको निर्माण सम्पन्न भएपछि उपभोक्ताले भोग्दै आएको झ्याप्प झ्याप्प बत्ती जाने र न्यून भोल्टेज (ट्रिपिङ) को समस्यामा उल्लेख्य कमी आउने अपेक्षा गरिएको छ ।

हाल नेपालले करिब १,००० मेगावाटसम्म विद्युत् निर्यात गर्न सक्ने क्षमता राख्दछ छ । तर, ढल्केबर–हेटौँडा ४०० केभी प्रसारण प्रणाली पूर्ण रूपमा सञ्चालनमा आएपछि यो क्षमता बढेर २,५०० देखि ३,००० मेगावाटसम्म पुग्ने आधार तयार हुने मन्त्री श्रेष्ठले दाबी गरे । यसले छिमेकी मुलुकहरूमा विद्युत् व्यापार विस्तार गर्न नेपाललाई ठुलो मद्दत पुग्ने छ ।

लामो समयको अन्योल चिर्दै आयोजनालाई गति दिन सफल भएकोमा खुसी व्यक्त गर्दै मन्त्री श्रेष्ठले यो सफलता कुनै एक व्यक्ति वा निकायको मात्र नभई सम्पूर्ण राज्य संयन्त्र र सरोकारवालाहरूको साझा प्रयासको परिणाम भएको बताए ।

‘यो आयोजनाको पूर्णताले नेपालको ऊर्जा भविष्यलाई नयाँ उचाइमा पुर्‍याउने छ,’ मन्त्री श्रेष्ठले भने, ‘अबको दुई महिनाभित्र यो आयोजना सम्पन्न गरी राष्ट्रिय प्रणालीमा जोड्ने हाम्रो लक्ष्य छ ।’