बोक्सीको आरोपमा महिलामाथि कुटपिट, दुई जना पक्राउ

सप्तरी । सप्तरीमा एक महिलामाथि बोक्सीको आरोप लगाएर कुटपिट गरिएको घटनामा संलग्न रहेको अभियोगमा प्रहरीले दुई जनालाई पक्राउ गरेको छ । पक्राउ पर्नेमा डाक्नेश्वरी नगरपालिका–१० बनौलाका ३८ वर्षीय जिवछप्रसाद साह र ३२ वर्षीय अजय मण्डल रहेका छन् ।

प्रहरीका अनुसार उनीहरूले सोही स्थानकी एक महिलालाई बोक्सीको आरोप लगाउँदै अश्लील गालीगलौज गरी कुटपिट गरेका थिए । घटनापछि फरार रहेका दुवैलाई प्रहरीले बनौलाबाट नियन्त्रणमा लिएको हो ।

पीडितको जाहेरीका आधारमा इलाका प्रहरी कार्यालय कल्याणपुरले कारबाही प्रक्रिया अघि बढाएको छ । प्रहरीले सप्तरी जिल्ला अदालतबाट पाँच दिनको म्याद थप गरी घटनाका बारेमा विस्तृत अनुसन्धान अघि बढाएको छ ।