कलाकार दीपाश्री निरौलाको ब्रेन ट्युमरको सफल शल्यक्रिया

काठमाडौं । चर्चित हास्य कलाकार तथा निर्देशक दीपाश्री निरौलाको मस्तिष्कको ट्युमर (ब्रेन ट्युमर) को सफल शल्यक्रिया गरिएको छ ।  स्वास्थ्यमा समस्या देखिएपछि उनलाई केही दिनअघि काठमाडौंको माइतीघरस्थित अन्नपूर्ण न्युरो अस्पतालमा भर्ना गरिएको थियो ।

अस्पतालका वरिष्ठ न्युरो सर्जन डा. वसन्त पन्त नेतृत्वको चिकित्सक टोलीले निरौलाको शल्यक्रिया गरेको हो । अस्पताल स्रोतका अनुसार शल्यक्रिया सफलतापूर्वक सम्पन्न भएको छ र हाल उनको स्वास्थ्य अवस्था सुधारोन्मुख रहेको छ ।

चिकित्सकहरूले शल्यक्रियामार्फत निकालिएको ट्युमरको प्रकृति परीक्षणका लागि प्रयोगशाला (बायोप्सी) मा पठाएका छन् । उक्त ट्युमर क्यान्सरयुक्त हो वा होइन भन्ने कुरा बायोप्सीको रिपोर्ट आएपछि मात्रै स्पष्ट हुने अस्पतालले जनाएको छ । अहिले उनलाई चिकित्सकहरूको विशेष निगरानीमा राखिएको छ ।

नेपाली कला क्षेत्रमा दशकौंदेखि सक्रिय दीपाश्री निरौला  ‘तितो सत्य’ जस्ता टेलिश्रृङ्खलाबाट लोकप्रिय बनेकी हुन् । अभिनयसँगै उनले  ‘छक्का पञ्जा’ जस्ता व्यावसायिक रूपमा अत्यन्त सफल चलचित्रहरूको निर्देशन गरेर नेपाली चलचित्र उद्योगमा बलियो पहिचान बनाएकी छन् ।

उनको स्वास्थ्य अवस्थाबारे जानकारी पाएपछि सामाजिक सञ्जालमा शुभचिन्तक तथा कलाकारहरूले स्वास्थ्य लाभको कामना गरिरहेका छन् ।