सुरक्षा र कूटनीतिमा असर पर्ने फिल्मलाई प्रदर्शन अनुमति नदिइने

काठमाडौं । सूचना तथा सञ्चार मन्त्रालयले राष्ट्रिय सुरक्षा, शान्ति–सुव्यवस्था तथा मित्रराष्ट्रसँगको कूटनीतिक सम्बन्धमा प्रतिकूल असर पर्ने विषयवस्तु समेटिएका चलचित्रलाई प्रदर्शन अनुमति नदिन चलचित्र विकास बोर्डलाई निर्देशन दिएको छ ।

मन्त्रालयले असार २६ गते बोर्डलाई पत्राचार गर्दै चलचित्र (निर्माण, प्रदर्शन तथा वितरण) ऐन, २०२६ को दफा ८ (३) अनुसार यस्ता चलचित्रलाई चलचित्र जाँच समितिबाट प्रदर्शन अनुमति दिन नमिल्ने व्यवस्था रहेको स्मरण गराएको हो । निर्देशनमा नेपालभित्र सार्वजनिक प्रदर्शन हुने सबै चलचित्रले प्रचलित ऐन तथा नियमावलीबमोजिम अनिवार्य रूपमा चलचित्र जाँच समितिबाट जाँचपास गराउनुपर्ने उल्लेख छ ।

मन्त्रालयले चलचित्र निर्माता, वितरक तथा सरोकारवालालाई ऐनको पूर्ण पालना गर्न आग्रह गर्दै जाँचका क्रममा कानुनविपरीतका विषयवस्तु भेटिएमा प्रदर्शन अनुमति नदिइने स्पष्ट गरेको छ । यही व्यवस्था सबै निर्माता, वितरक तथा सम्बन्धित पक्षलाई जानकारी गराई आवश्यक समन्वय गर्न पनि मन्त्रालयले चलचित्र विकास बोर्डलाई निर्देशन दिएको छ ।