मोरङको सुनवर्षीमा नाबालिकाको हत्या, घन्सीबारीमा भेटियो शव

विराटनगर । मोरङको सुनवर्षीमा हत्या भएको अवस्थामा नाबालिकाको शव फेला परेको छ । सुनवर्षी नगरपालिका–९ डाइनियास्थित मुस्लिम टोलका जफारुल मियाँकी ४ वर्षीया छोरी कायानत खातुनको हत्या भएको हो ।

मोरङ प्रहरी प्रमुख एसपी कवित कटवालका अनुसार हत्या गरेर फालेको अवस्थामा घरदेखि करिब २ सय मिटर पूर्वमा रहेको घन्सीबारीमा शुक्रबार साँझ ७ः३० बजेतिर बालिकाको शव भेटिएको हो । बालिकाको हत्या भएको जानकारी पाउनसाथ घटनाको अनुसन्धानका लागि एसपी कटवाल आफैं घटनास्थल पुगेका थिए ।

उनका अनुसार शुक्रबार अपरान्ह ४ बजेदेखि नाबालिका हराएको जानकारी अभिभावकले दिएका छन् । खोजी गर्ने क्रममा हत्या गरेर फालेको अवस्थामा घन्सीबारीमा शव फेला परेपछि स्थानीयले प्रहरीलाई खबर गरेका थिए ।

एसपी कटवालका अनुसार बालिकाको निधार र कन्चटमा गहिरो चोट रहेको छ । ‘शरीरमा माथिको कपडा खोलेको र तलको लगाएको अवस्थामा शव फेला परेको हो । माथिको कपडा नलगाएको अवस्थामा नै घरबाट बेपत्ता भएको भन्ने कुरा आएको छ । निधार र कन्चटमा चोट रहेको अवस्थामा बालिकाको शव फेला परेको हो । घटनाको प्रकृति हेर्दा बलात्कार भएजस्तो देखिँदैन,’ उनले भने ।

उनका अनुसार शव र घटनास्थलको प्रकृति हेर्दा अभिभावकसँगको कुनै पुरानो रिसईबीका कारण नाबालिकाको हत्या गरेर शव घन्सीबारीमा फालिदिएको जस्तो देखिन्छ । आवश्यक कानुनी प्रक्रिया पूरा गरेर शवलाई राति ११ः२० बजेतिर पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको जानकारी कटवालले दिए ।

‘नाबालिकाको हत्या के कारणले, किन र कसले गरेको हो भन्ने यकिन भइसकेको छैन । पोस्टमार्टम रिपोर्ट प्राप्त भएर विस्तृत अनुसन्धान गरेपछि घटनाको कारण पत्ता लाग्छ,’ उनले भने । हत्यामा संलग्नको हालसम्म पहिचान भइनसकेको प्रहरीले जनाएको छ ।

हत्यामा संलग्नको खोजी र घटनाको विस्तृत अनुसन्धानका लागि इलाका प्रहरी कार्यालय रंगेलीका इन्स्पेक्टर अशोककुमार झा नेतृत्वको टोली परिचालित छ । इन्स्पेक्टर झा नेतृत्वको टोलीले घटनास्थलमा पुगेर सबै पक्षसँग सोधपुछ गर्दै घटनाको कारण पत्ता लगाउने प्रयास गरिरहेको छ । साथै, नाबालिकाको हत्यामा संलग्नको पनि खोजी भइरहेको प्रहरीले जनाएको छ ।