कोशीका तीन जिल्लामा प्रहरीको अपरेसन, ८ जना पक्राउ

विराटनगर । कोशी प्रदेशका तीन जिल्ला मोरङ, सुनसरी र झापामा प्रहरीले सञ्चालन गरेको छुट्टाछुट्टै अपरेसनमा लागुऔषध ब्राउन सुगर (खैरो हिरोइन)सहित आठ जना पक्राउ परेका छन् ।

पक्राउ परेकामध्ये एक जना भारतीय नागरिकसमेत रहेका छन् । पक्राउ परेकाको साथबाट विभिन्न परिमाणमा लागुऔषध बरामद भएको प्रहरीले जनाएको छ ।

Advertisement

मोरङ प्रहरीले विराटनगर महानगरपालिका–४ लालिगुराँस टोलबाट एक जनालाई पक्राउ गरेको छ । विशेष सूचनाका आधारमा सीआरभी भट्टाचोक र लागुऔषध नियन्त्रण ब्यूरो विराटनगरको संयुक्त टोलीले सुनसरीको दुहबी नगरपालिका–१२ का २१ वर्षीय धनकुमार यादवलाई पक्राउ गरेको हो ।

यादवको साथबाट १०४ ग्राम खैरो हिरोइन बरामद भएको छ । उनीमाथि थप अनुसन्धान भइरहेको प्रहरीले जनाएको छ ।

यस्तै, मोरङकै कानेपोखरी गाउँपालिका–५ मानेचोकस्थित एक घरमा लागुऔषध सेवन तथा कारोबार भइरहेको भन्ने गोप्य सूचनाका आधारमा रमाइलो प्रहरी चौकीको टोलीले छापा मार्दा स्थानीय २५ वर्षीय अमित धिमाल र २७ वर्षीय पर्वत राई पक्राउ परेका छन् । प्रहरीका अनुसार उनीहरूको साथबाट १ ग्राम ३७० मिलिग्राम खैरो हिरोइन बरामद भएको छ । दुवै जनालाई इलाका प्रहरी कार्यालय पथरीमा राखेर अनुसन्धान अघि बढाइएको छ ।

यसैगरी, मोरङको सुनवर्षी नगरपालिका–८ सिक्टी खरेबारी सडकखण्डमा विशेष सूचनाका आधारमा प्रहरी चौकी सिक्टी, प्रहरी चौकी बरडंगा र सशस्त्र प्रहरीको बीओपी सिक्टीको संयुक्त टोलीले भारतीय नम्बर प्लेट (बीआर ३८ के ३१७९)को मोटरसाइकल रोकेर चेकजाँच गर्दा चालक भारत बिहार राज्यका ४३ वर्षीय भक्ति पासवान पक्राउ परेका छन् । उनले मोटरसाइकलको टुलबक्समा लुकाइछिपाइ राखेको ८२० मिलिग्राम खैरो हिरोइन फेला परेको प्रहरीले जनाएको छ । उनीमाथि इलाका प्रहरी कार्यालय रंगेलीले थप अनुसन्धान गरिरहेको छ ।

पूर्व–पश्चिम राजमार्गअन्तर्गत सुनसरीको इनरुवा नगरपालिका–४ बसपार्कबाट जिल्ला प्रहरी कार्यालय सुनसरी र अस्थायी प्रहरी पोस्ट बसपार्क इनरुवाको संयुक्त टोलीले पैदल हिँडिरहेका मोरङको उर्लाबारी–४ का २४ वर्षीय बुद्धिमान साह र २२ वर्षीय एलिस राईलाई पक्राउ गरेको छ । उनीहरूको साथबाट ४ ग्राम ३६० मिलिग्राम खैरो हेरोइन बरामद भएको प्रहरीले जनाएको छ । दुवै जनामाथि जिल्ला प्रहरी कार्यालय सुनसरीले अनुसन्धान गरिरहेको छ ।

झापाको बिर्तामोड नगरपालिका–२ त्रिशूली चोकमा लागुऔषध कारोबार भइरहेको भन्ने गोप्य सूचनाका आधारमा इलाका प्रहरी कार्यालय अनारमनीको टोलीले स्थानीय २४ वर्षीय प्रवेश सहनी र २५ वर्षीय किरण शर्मालाई पक्राउ गरेको छ । उनीहरूको साथबाट २ ग्राम ८४० मिलिग्राम ब्राउन सुगर बरामद भएको प्रहरीले जनाएको छ ।

प्रहरीका अनुसार पक्राउ परेका सबैमाथि विस्तृत अनुसन्धान भइरहेको छ । उनीहरुविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।