पहिरोमा बेपत्ता २ जना महिला मृत फेला

काठमाडौं। रोल्पाको सुनछहरी गाउँपालिका-१ सेरमस्थित दवाङ लेकमा शनिबार दिउँसो पहिरो जाँदा २ जना महिलाको मृत्यु भएको छ।

गाईबाख्रा चराउन गएका बेला माथिबाट एक्कासि पहिरो खसेर बेपत्ता भएका उनीहरू खोजीका क्रममा मृत अवस्थामा भेटिएका हुन्। मृत्यु हुनेमा स्थानीय ३५ वर्षीया अमिरा घर्ती मगर र ३८ वर्षीया असौजी घर्ती मगर रहेको सुनछहरी गाउँपालिकाका अध्यक्ष धनबहादुर पुनले बताए।

Advertisement

उक्त पहिरोमा परेर ६२ वर्षीय कुले घर्ती गम्भीर घाइते भएका छन्। उनको उद्धार गरी उपचारका लागि स्थानीय सेरम स्वास्थ्य चौकी पुर्‍याइएको र अहिले उपचार भइरहेको अध्यक्ष पुनले जानकारी दिए।

जिल्ला प्रहरी कार्यालय रोल्पाका अनुसार गाईबाख्रा चराइरहेका बेला माथिबाट एक्कासि पहिरो खसेर दुर्घटना भएको हो।