देवानगन्ज घटनापछि सीमामा ‘हाइ अलर्ट’, आईडी कार्डबिना नेपाल प्रवेशमा रोक

विराटनगर । सुनसरीको देवानगन्ज–३ कप्तानगन्जमा भएको घटनापछि कोशी प्रदेशका भारतसँग सीमा जोडिएका जिल्लाका नाकामा सुरक्षा व्यवस्था थप कडा बनाइएको छ ।

सम्भावित घुसपैठ, धार्मिक संगठनको आवरणमा नेपाल प्रवेश गर्ने समूह, हातहतियार तथा लागुऔषध ओसारपसारको जोखिमलाई मध्यनजर गर्दै नेपाल–भारत सीमा क्षेत्रमा विशेष निगरानी बढाइएको हो । अब भारतबाट नेपाल प्रवेश गर्न आउने व्यक्तिले परिचयपत्र (आईडी कार्ड) अनिवार्य रूपमा देखाउनुपर्ने व्यवस्था गरिएको छ । वैध परिचयपत्र भएका व्यक्तिलाई मात्र नेपाल प्रवेश गर्न दिइने सुरक्षा निकायले जनाएका छन् ।

कोशी प्रदेश सरकारले देवानगन्ज घटनापछि उत्पन्न सुरक्षा अवस्था, सामाजिक सद्भाव र शान्ति व्यवस्थाको समीक्षा गर्न विराटनगरस्थित आन्तरिक मामिला तथा कानुन मन्त्रालयमा बुधबार सर्वपक्षीय बैठक बोलाएको थियो । मुख्यमन्त्री हिक्मतकुमार कार्कीको अध्यक्षामा बसेको बैठकमा कोशी प्रदेश प्रहरी प्रमुख डीआईजी शेखर खनालले सीमा क्षेत्रमा सुरक्षा व्यवस्था उल्लेखनीय रूपमा कडा पारिएको जानकारी दिए ।

उनका अनुसार घटनालाई अवसर बनाएर बाह्य तत्वको घुसपैठ, हातहतियार तथा लागुऔषधको अवैध कारोबार बढ्न सक्ने जोखिम रहेकाले भारतसँग जोडिएका सीमा नाकामा अतिरिक्त सुरक्षा सतर्कता अपनाइएको छ । उनले मधेश प्रदेशबाट समेत थप प्रहरी जनशक्ति सुनसरीमा परिचालन गरिएको जानकारी दिए । कोशीका पहाडी लगायत अन्यत्र जिल्लाबाट पनि सुरक्षाकर्मी झिकाएर सुनसरी केन्द्रित गरिएको छ ।

यस्तै, बैठकमा सहभागी मोरङका प्रमुख जिल्ला अधिकारी युवराज कटेलले भारतबाट धार्मिक संघ–संगठनको नाममा केही समूह नेपाल प्रवेश गर्न सक्ने सूचना प्राप्त भएकाले मोरङका सीमा नाकामा सुरक्षा निगरानी कडा बनाइएको बताए । उनले परिचयपत्र भएका व्यक्तिलाई मात्र नेपाल प्रवेश गर्न दिइने र शंकास्पद गतिविधिमाथि विशेष निगरानी राखिएको स्पष्ट पारे । ‘देवानगन्ज घटनापछि सीमामा सुरक्षा निकाय ‘हाइ अलर्ट’मा छ । आईडी कार्डबिना प्रवेशमा रोक लगाइएको छ,’ प्रजिअ कटेलले भने ।

गत आइतबार राति सुनसरीको देवानगन्ज–३ कप्तानगन्जमा दुई पक्षबीच भएको झडप नियन्त्रणमा लिन प्रहरीले गोली चलाउँदा २५ वर्षीय ओमप्रकाश मेहताको मृत्यु भएको थियो । घटनामा गोली लागेर नौ जना घाइते भएका थिए भने सुरक्षाकर्मीसहित घाइतेको संख्या २२ भन्दा बढी पुगेको छ ।

उक्त घटनापछि सुनसरीसहित विभिन्न स्थानमा विरोध प्रदर्शन, आगजनी, तोडफोड, आक्रमण, लुटपाट तथा सवारीसाधन सञ्चालनमा अवरोधजस्ता घटना भएका छन् । सोमबारदेखि सुनसरीको सुरक्षा अवस्था तनावग्रस्त बनेपछि प्रशासन र सुरक्षा निकायले सुरक्षा व्यवस्था थप सुदृढ बनाउँदै सीमा क्षेत्रदेखि जिल्लाभित्रसम्म उच्च सतर्कता अपनाएका हुन् ।

सर्वपक्षीय बैठकमा सहभागी पक्षहरूले शान्ति, सुरक्षा र सामाजिक सद्भाव कायम राख्न सबै राजनीतिक दल, स्थानीय समुदाय, धार्मिक अगुवा र नागरिक समाजलाई संयमता अपनाउन आग्रह गर्दै अफवाह र उत्तेजनात्मक गतिविधिबाट टाढा रहन अपिल गरेका छन् ।