चोरी गरेर भारत पुर्‍याउन लागिएको सिटी सफारी विराटनगरबाट नियन्त्रणमा, एक जना पक्राउ

विराटनगर । मोरङको सुन्दरहरैँचा नगरपालिका–१० बाट चोरी भएको सिटी सफारी भारततर्फ लैजाँदै गरेको अवस्थामा विराटनगरबाट प्रहरीले नियन्त्रणमा लिएको छ । घटनामा संलग्न रहेको आरोपमा एक जनालाई पक्राउ गरिएको छ ।

प्रहरीका अनुसार शनिबार बिहानका राति नारायणप्रसाद थपलियाको घरमा प्रवेश गरी दराजमा राखिएको सुनचाँदीका गरगहना तथा घरअगाडि पार्किङमा राखिएको प्रदेश १–०२–००४ ह ८६३९ नम्बरको हरियो रंगको सिटी सफारी चोरी भएको थियो । बिहान ८ बजे घटनाको जानकारी प्राप्त भएपछि इलाका प्रहरी कार्यालय विराटचोकको टोली घटनास्थल पुगेको थियो ।

घटनास्थलको निरीक्षणका क्रममा प्रहरीले एउटा पुरानो साइकल, दुईवटा तामाको कलश, तार काट्ने कैँची र एउटा छाता फेला पारेर नियन्त्रणमा लियो । त्यसपछि विभिन्न प्रहरी कार्यालयमा सूचना प्रवाह गरी खोजतलास तीव्र बनाइएको थियो ।

सोही क्रममा बिहान करिब ८ः२० बजेतिर इलाका प्रहरी कार्यालय रानीबाट खटिएको टोलीले विराटनगर महानगरपालिका–१६ दरैयामा सफारी फेला पार्यो । भारततर्फ लैजाँदै गरेको अवस्थामा चोरी भएको सफारी नियन्त्रणमा लिइएको मोरङ प्रहरीका सूचना अधिकारी मकेन्द्रकुमार मिश्रले बताए ।

उनका अनुसार सफारी भारत कटाउन लागेका उदयपुर घर भई हाल विराटनगर–४ बस्ने ३२ वर्षीय मणिकुमार तामाङलाई पक्राउ गरिएको छ । पक्राउ परेका तामाङको साथबाट चोरी भएको सफारी र सुनजस्तो देखिने पहेँलो धातुका गरगहना बरामद गरिएको प्रहरीले जनाएको छ । घटनाका सम्बन्धमा थप अनुसन्धान भइरहेको प्रहरीले जनाएको छ ।